日本Uber推出人力車服務，可免費遊覽東京淺草30分鐘！

日韓旅遊日本旅遊

By Jennifer on 29 May 2023

Digital Editor

今晚食乜餸：小二，嚟一碟花生！

淺草係東京其中一個熱門景點，每年都吸引大批遊客。日本Uber宣佈將會推出人力車預約服務，旅客可以預約人力車，免費遊覽東京淺草30分鐘！有關服務屬於「期間限定」，大家近日去東京嘅話可以試下預約～

東京淺草雲集各種日本特色美食，加上淺草寺，基本上係外國遊客到訪必去嘅景點之一。不過淺草唔細，如果係第一次去，可能會唔知從邊度睇起。日本Uber近日就推出「人力車服務」，用戶可以喺App預約，到時就可以搭人力車遊覽淺草。

人力車設有車棚，即使係晴天都會唔太曬，好適合最近嘅天氣，而且車夫亦會為乘客介紹周圍嘅景點，簡直係遊客遊覽淺草嘅最佳交通工具！

呢項人力車服務更係免費！人力車服務為先到先得，而用戶每次亦最多只可預約兩部人力車，成功預約後人力車會載乘客遊覽雷門、淺草演藝廳等熱門旅遊景點，全程大約30分鐘。

雖然淺草地區一直都有人力車呢個服務，不過唔少遊客因為言語不通而未有搭到，但依家用Uber App就可以預約到人力車，唔驚會出現語言不通嘅情況啦～同時又可以體驗到當地嘅特色文化。

不過呢個服務係期間限定，預約時間亦有指定時間，如果大家最近去東京玩嘅話，不妨把握機會預約人力車遊覽一下當地。

日本Uber人力車預約服務
日期：即日起至6月2日
時間：11:00～12:00

Text: HolidaySmart Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）

東京新酒店2023｜星野集團酒店「OMO3淺草」7月開幕！24小時自助區

19 Apr 2023

「OMO」係星野集團嘅都市觀光酒店品牌，OMO有新酒店進駐東京淺草，酒店不但近市中心，更可欣賞東京夜景。房價為300多港元起一人，酒店設有24小時自助美食飲品區，適合香港旅客！

Photo from OMO3淺草

淺草係唔少香港人遊東京必去嘅地方，淺草寺「雷門」打卡幾乎係東京旅遊嘅指定動作。星野集團嘅「OMO」品牌新酒店就選址淺草，交通十分方便，酒店將於7月31日開幕，屆時大家去東京旅遊又多一間酒店選擇～

Photo from OMO3淺草

「OMO3淺草」合共有98間房，主要分為3種房型，但有不同風格嘅房間。除咗普通嘅雙床房之外，仲有一款「YOSE雙床房」，房間設計參考咗表演古典說話藝術「落語」嘅淺草演藝廳，房間有紅色地氈同紫色坐墊，供1～2人入住。房間雖然唔算大，但有2張單人床，設施亦一應俱全。

Photo from OMO3淺草

豪華雙人間面積有33平方米，同樣有兩張床，同時房間仲有梳化、浴缸，坐喺梳化可以睇到淺草夜景。豪華四人間則最多可容納4人入住，房間鋪設了榻榻米，適合一班好友或一家大細。另外仲有其他不同設計嘅房間。

Photo from OMO3淺草

酒店最高嘅一層可以飽覽淺草寺同東京晴空塔嘅景色，邊用餐邊欣賞夜景絕對係一大享受！酒店內更設有24小時嘅「Food and Drink Station」，有飯團、麵包、甜品、零食等，飲品方面則有咖啡、果汁、清酒等提供，不過留意Food and Drink Station唔接受現金，只能用電子貨幣或信用卡支付。