周潤發上海跑步被市民圍觀追影，罕有耍手擰頭拒絕拍攝？！

娛樂新聞

By Jennifer on 19 Jun 2023

Digital Editor

今晚食乜餸：小二，嚟一碟花生！

周潤發（發哥）向來親民，佢平時堅持運動，晨跑、行山經常獲野生捕獲，而發哥對於市民嘅合照要求亦唔會托手踭。最近發哥喺上海晨跑時就吸引大批市民跟跑，有人更邊跑邊影發哥，發哥更疑似感不滿拒絕拍攝？！

Photo from 劉嘉玲微博

周潤發現身上海堅持每日跑步

現年68歲嘅發哥keep得好好，每次見佢都精神奕奕，發哥多年嚟都堅持每日跑步，平時又經常行山，因此身型一直都keep得好fit，向來親民嘅發哥喺晨跑、行山時亦會獲市民野生捕獲，發哥任影唔嬲之餘，更會親自拎手機自拍。

Photo from 《無雙》

最近發哥因為工作飛去上海，發哥一如以往作風，每日堅持晨跑，唔少上海市民都喺外灘等地偶遇發哥，於是「許文強重返上海灘」呢個話題隨即掀起內地網友熱話。

Photo from 小紅書

大批市民陪發哥跑步

之後唔少網友都跟隨發哥一齊跑步，喺小紅書有好多人分享佢哋同發哥晨跑嘅相片、影片，可見發哥大多數都喺外灘跑步，佢身後有大批市民跟住一齊跑，人數有約20～30人，更有人帶埋小朋友。

Photo from 小紅書

親民發哥揸機影大合照

而發哥依然親民，跑完仲會揸機自拍影大合照，見到大家嘅笑容都十分燦爛，網友大讚發哥比內地藝人親民得多，完全唔似大明星。有疑似保安亦被發哥魅力吸引，請求合照，發哥當然無托手踭，同對方selfie。喺出發跑步之前，發哥又同市民講大家要慢慢跑，唔好講嘢，跑步時注意自己嘅呼吸。

Photo from 小紅書

發哥疑似拒絕拍攝，網友批追拍對發哥造成困擾

亦有網友拎住手機邊跑邊影發哥，雖然發哥跑步似乎未受影響，跑完步更同大家影大合照，但亦有網民影到發哥對住鏡頭耍手擰頭，疑似拒絕拍攝！呢段片段亦引起網民熱議。

Photo from 小紅書

有網友認為大批民眾追住發哥影相拍片對發哥造成困擾，指拍片嘅人無尊重發哥感受，又稱發哥喺香港行山、跑步都唔會有咁多人跟住。亦有人表示如果只係跟住一齊跑步咁就無咩問題，但有啲拍片嘅人只係為咗將影片放上網博取關注同討論。有影相嘅人就反駁指其中一個拎住拍攝器材嘅人其實係發哥嘅工作人員，不過佢亦表示喺跑嘅過程中，有兩位發哥嘅工作人員維持秩序，督促大家安全跑步、唔好影相等等。