三款人氣紫薯甜品～紫薯控又係時候出動啦！西灣河銅鑼灣天后都有分店！

By 123testing on 08 Sep 2017

紫薯甜品一直係港嘅大愛，今次明記新推出嘅三款紫薯甜品，包括有紫薯窩夫、紫薯布甸同紫薯心太軟，一個字，正！

Photo from PressLogic

老字號明記甜品係西灣河已經好出名，近呢幾個月仲係銅鑼灣同天后開埋新分店，想開始走年輕嘅路線。西灣河同天后嘅店鋪已經開始推出一系列紫薯甜品，而銅鑼灣分店就會係星期一(11/9)推出。

Photo from PressLogic

小編大力推薦紫薯心太軟，外面紫薯蛋糕紫薯味已經好濃郁，加埋入面熱辣辣嘅流心紫薯漿，口入面完全充滿晒濃烈嘅紫薯味，另外你仲可以揀雪糕嘅口味，有雲喱拿、綠茶、朱古力味等等比客人揀，仲配上好多煙煙韌韌嘅芋圓，而且有齊香芋、紫薯、地瓜三種味，最後亦不忘淋上令味道進一步升華嘅紫薯汁，完全抗拒唔到。

Photo from PressLogic

同樣有芋圓做伴碟嘅紫薯窩夫，好大份好吸引。紫薯窩夫係用紫薯漿加麵粉、雞蛋等等去製成，窩夫比較鬆軟，外邊微脆，切開仲見到少少淺色嘅紫薯餡，再淋上紫薯汁，完全滿足晒紫薯控嘅慾望。而且仲有兩個甜筒，以「倒插」嘅形式擺放，岩晒呃年輕人呃like影相。食唔晒嘅朋友都唔流怕，有半份同一份揀，相差$20，不過一份當然豐富D啦，有一整件格仔窩夫再加兩球反轉雪糕筒同埋芋圓。

Photo from PressLogic

紫薯布甸外貌相較另外兩款遜色，但味道都唔錯，而且好特別，好滑捋捋。布甸分咗兩層，上層果層深色啲嘅係紫薯蓉同紫薯粒，食落會有沙沙地嘅感覺，下面就係紫薯布甸，不過味道就清淡一D。不過面頭淋左花奶，令甜味升級，但如果想再勁啲紫薯味，都可以改加紫薯醬！

Photo from PressLogic

不過唔太好紫薯嘅朋友，其實除左新推甜品，佢地嘅傳統糖水一樣咁出色，例如招牌芝麻糊，佢地堅持每日炒十斤芝麻，再用石磨磨足三至四小時，而且採用天然片糖，絕對真材實料！新式甜品方面，當然唔少得烤棉花糖焦糖燉蛋，將燒過嘅棉花糖鋪係燉蛋上面，味道夾得好好之餘又唔會太甜。另外仲有專為榴槤愛好者設計嘅一系產品都好吸引，簡直食指大動！