人氣滑蛋鰻魚熱狗外賣店重開轉攻地舖～仲有超巨型吉列炸蝦熱狗同滑蛋鰻魚飯

我諗大家對曾經係IG風摩一時嘅滑蛋鰻魚熱狗外賣店 - 白羊・座都唔會陌生～
之前以為佢係荔枝角嘅外賣店突然執左，集滑蛋同鰻魚控於一身嘅小編都忍唔住留左兩行眼淚！
但最近比小編發現佢地原來靜雞雞轉攻大圍，仲落地生根變左地舖！所以一定要為大家介紹下啊！


原來白羊座取名自兩位店主嘅星座‌～店舖樓面係由女主人負責；廚房大權就由男主人掌控，實行「男主內，女主外」，分工合作好合拍嫁！Photo from Presslogic

舖仔唔算好大，只有大約10張4人枱，但勝在地方都好骨緻。終於有地舖，小編大感幸福，可以慢慢坐係度嘆滑蛋鰻狗了～
Photo from Presslogic

打頭陣嘅當然有 日式鰻魚滑蛋飯 ($78 - 午市限定)
晚市就會自動upgrade左，變成係黑松露滑蛋。所以想食最原本嘅滑蛋鰻魚飯就記得mark好晏晝時間黎喇！
鰻魚煮得好腍啊～烤到啲骨軟哂，食落其實完全唔感覺到有骨！上面再淋上滿滿嘅鰻魚汁同木魚絲。Photo from Presslogic

滑蛋真係好滑好滑，每一啖都釋放住濃濃蛋香，真係超幸福啊～

同一樣都係鰻魚同滑蛋嘅組合，當然唔少得嘅係佢地嘅招牌熱狗～
火炙芝士鰻魚滑蛋熱狗 ($58)
上面舖住海量嘅芝士，用火槍輕輕燒過，令到芝士變成半溶嘅狀態，更加能夠帶出芝士嘅香濃味道～
Photo from Presslogic

熱狗中間塞滿厚厚一層嘅超滑玉子，而麵包皮有微微烤過，鬆軟得黎包邊帶脆。一啖咬落去真係大滿足啊！


推介埋另一款必嗌熱狗～
火炙芝士珍寶吉列蝦滑蛋熱狗 ($55)
隻蝦真係超巨大呀！上面仲要唧左小編最愛嘅邪惡沙律醬～
Photo from Presslogic

個超巨大炸蝦真係有成隻手掌咁長嫁！炸到熱辣辣食真係好邪惡～但真係蝦肉實在太彈牙太好味了，小編忍唔住就鯨吞左成隻！
Photo from Presslogic

所有熱狗仲可以加錢 轉黑松露滑蛋 (+$8)
滑蛋加上黑松露真係不得了啊～ 一上枱已經聞到超香濃嘅黑松露味！加8蚊轉小編覺得性價比高喔～
Photo from Presslogic

下午茶仲有以下呢款蝦多士做選擇～
芝士松露蝦多士 (散叫 $50; 下午茶餐包飲品 $48)
而令呢個蝦多士同坊間唔同嘅係蝦多士裡面係包住芝士同松露～蝦多士嘅蝦膠真係打得超彈牙！
Photo from Presslogic

變左地舖後 餐廳更加新增左好多扒類嘅選擇，想平平地据個扒都完全無問題～
紐西蘭西冷 ($108)
肉質非常嫩滑、份量十足，仲可以配意粉。女友即使要拉埋男朋友黎食都唔洗擔心佢會餓親～
Photo from Presslogic

飲品方面推介呢款冰藍檸檬梳打 ($40)
酸酸甜甜嘅梳打水超級解渴 真係睇見都透心涼啊～
Photo from Presslogic

小編溫馨提示，留意店舖只收現金喔～

白羊・座 (Aries Cafe)
地址： 大圍積信街63號積信樓地下59號舖
電話：52049249
營業時間：星期一至日 11:30-21:30