好CHILL呀～ 銅鑼灣高質樓上café～慶生 聚會 以後唔洗淨係去放題同Party Room喇！

成日出街已經唔知食咩好？周圍啲餐廳又多人，啱啱先放低餐具，侍應就好盡責地秒速問你「請問食完未？」，即係問你「請問肯走未？」。想真真正正放鬆食個飯啫，不如睇下尼間啱唔啱你？

Photo from Presslogic

無論慶祝聚會、拍拖定放lunch（小編：間唔中食貴啲都要嘅～食好啲先有動力做野㗎嘛～小編當日真係見到唔少上班族嚟食lunch㗎～），都適合㗎！講緊嘅係依間位於銅鑼灣，裝潢美輪美奐，食物優質，款式眾多而且好有格調嘅樓上café，ZENSE café喇！

Photo from Cafe Zense FB 專頁

先論環境，餐廳有一個開放式調飲品嘅地方。

Photo from Cafe Zense FB專頁

暗色調嘅燈光加淺灰色嘅磚牆加木系嘅餐桌再加上舒適嘅梳化凳等於咩呀？咪就係CHILL囉！認真一坐就想CHILL翻幾粒鐘呀！

Photo from Presslogic

嚟到重頭戲，首先要推介嘅係尼個招牌小食拼盤， ZENSE Snack Combo($138)。

拼盤包咗雞翼、德國腸、雞塊、沙律 同埋鎮店之寶──脆卜卜脆薯條～～～～～ 唔係講笑，尼個薯條真係攞命，食到最尾嗰條薯條都仲係脆㗎～陰公！仲要佢尼款薯條唔係好實心會食到口乾個隻，而係有啲似扭扭薯條嘅口感，外脆內軟。份量啱啱好唔會太多，夠三至四個人share當小食!

Photo from Presslogic

跟住嚟到主菜，尼個係忌廉波菜龍利柳（$128）。

龍利柳煮得剛好，肉質鮮嫩，非常juicy！忌廉芝士醬汁亦調配得好好，唔會太鹹，份量剛好食完道菜。建議龍利柳配埋波菜一齊食仲正，好fresh嘅波菜可以同忌廉中和翻，食落無咁腬。唔好睇佢細細份咁呀，食完其實都幾飽㗎！

Photo from Presslogic

如果你係唔食海鮮嘅，或者係一定要有澱粉質落肚先夠飽嘅話，可以試下尼個芥末忌廉汁煙鴨胸義大利粉（$108）。雖然唔係配濃郁嘅忌廉汁，但係義大利粉本身先用洋蔥爆香，所以一樣好食㗎！

Photo from Presslogic

值得一試嘅仲有佢啲沙冰飲品，非常大杯~滿到瀉夾超值嘅Mixed Berries Yogurt Smoothie($52)，酸酸甜甜好開胃呢!

入口好重雜莓味，後勁湧出一股好重嘅乳酪香。而且一路飲，中間比較硬身嘅沙冰會慢慢融化成流沙狀，所以，重點！飲到最後都仲知道自己係叫咗沙冰（你明的）。除咗乳酪系列，豆腐系列嘅沙冰亦都十分出色㗎！有機會可以試埋。

Photo from Cafe Zense FB專頁

另外，如果想呼吸新鮮空氣嘅話，亦可以選擇室外嘅座位，吹下自然風。

Photo from Cafe Zense FB專頁

Photo from Cafe Zense FB專頁

餐廳亦歡迎客人舉行Private Party，所以如果想幫人慶祝，又r爆頭唔知去邊，不妨試下尼間高質嘅樓上café喇！快啲約埋朋友或者另一半今個weekend去食餐CHILL㗎喇！

Platform
地址：銅鑼灣謝斐道460-462楊耀熾商業大廈4樓
電話：28922249
營業時間：
星期日至四 12:00-00:00
星期五至六 12:00-1:00
付款方式：只收現金
備註：建議先致電預約座位

Text: Holiday Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）

*本文章的圖片均經其本人或其公司授權，其他媒體不得轉載