又係文青打卡嘅時候喇喂! 高雄旗津風車公園～俾你體驗下馬路上奔馳嘅感覺！

去台灣旅行，第一樣諗到嘅可能係食！第二樣諗到嘅可能都係食！食同埋食！其實去台灣又點止去夜市呀～身為文青嘅你，又點少得搜羅各地充滿藝術氣息嘅地方打卡呀～ 今次介紹嘅就係位於高雄旗津嘅風車公園喇！

Photo from Presslogic

無敵大海景係佢地嘅賣點之一，唔好以為公園內一座座嘅風車塔只係用嚟觀光啊，其實佢主要功用係風力發電㗎！七座風車塔所產生嘅能源係供應公園內嘅照明用嘅。

風車旁邊仲有幾塊草地，上面有好多以海洋生物為主題嘅藝術品，生動又有趣，文青指數立刻飆升!

另外，風車前面設有觀海看台同表演廣場，有時候會有啲文藝活動喺尼度舉行㗎！

Photo from Presslogic

咁點樣由市區去旗津打卡嘅地方呢？首先，乘搭高雄捷運到西子灣站，出咗站之後步行約10分鐘到渡輪站轉搭鼓山渡輪(NT25)就可以到達旗津㗎喇！如果選擇自己揸機車去嘅朋友唔洗擔心，因為渡輪嘅下層係專俾機車同司機嘅。

Photo from Presslogic

到達旗津之後，有唔少人都會選擇租單車環島遊，沿海行駛，欣賞住沿途嘅景色，不知不覺地好快就去到風車公園㗎喇，來回只需一小時。

Photo from Presslogic

一出碼頭就會見到好多間租單車嘅舖頭，價錢都差無幾。單車有分單人或家庭，亦可選電動(第一小時NT400，之後每小時NT200)或腳踏 (第一小時NT300，之後每小時NT100)，不過其實係可以嘗試同店員格價的，所以價錢都係以店鋪作準。

Photo from Presslogic

仲有，因為單車路同馬路其實只係用一條行車線分隔，所以過程真係好似揸緊機車係路上奔馳咁㗎！咁當然係龜速個隻喇～哈～

Photo from Presslogic

總之無車牌嘅小編就覺得真係好正囉唔該！好值得一試!

Photo from Presslogic

回程還完車之後仲可以去旗津老街嘅小店食冰，消消暑添！尼三個分別係珍珠奶茶冰同紅豆牛奶冰～冰店位於一出碼頭嘅右前方有條直路，行到街尾嘅右手邊就係喇！

Photo from Presslogic

Platform
風車公園
地址：高雄市旗津區旗津二路
電話：+886-7-5712500
營業時間：全天候開放

太和元氣
地址：高雄旗津區
營業時間：10am－10pm

備註：以上價格只作參考，一切以店鋪為準。

Text: Holiday Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）

*本文章的圖片均經其本人或其公司授權，其他媒體不得轉載