Edan被指打斷Anson Lo講嘢！神徒不滿掀罵戰！Edan公開致歉

By Jennifer on 26 Mar 2024

Digital Editor

今晚食乜餸：小二，嚟一碟花生！

MIRROR 12位成員近日齊齊獲邀做Do姐YouTube節目《The Do Show》嘉賓，不過卻因為Edan（呂爵安）打斷Anson Lo（盧瀚霆）說話引起部分神徒不滿，繼而令兩邊fans罵戰。近日Edan同Anson Lo出席公開活動時就回應事件。

MIRROR作為人氣男團，每位成員都有個人粉絲，fans之間也會有爭執。而近日Edan就被指打斷了教主Anson Lo的發言而引起神徒不滿，Edan的fans爵屎保護偶像心切，雙方掀起罵戰。

Photo from MIRROR

Photo from ViuTV

當時Do姐問Anson Lo有甚麼壞習慣，他指自己兩三天就要剪指甲，之後Do姐問他今年剩下的時間想做甚麼，此時Edan搶答：「想唔好成日剪指甲囉！」教主一臉無奈表示：「剪指甲真係咁無聊咩？我都係share下我好鐘意剪指甲啫！」Edan即笑言：「唔好嬲啦！講下笑啫！」

MIRROR出席公開活動時，Edan也為此道歉：「對唔住，我以後唔會亂講嘢。」後者則表示不用道歉，並回應：「我都講對唔住。」Edan即表示：「千祈唔好，唔敢當唔敢當！」教主最後呼籲粉絲和平相處。

不過之前Edan亦有公開回應網民指作同Anson Lo炒CP，Edan直言：「得閒就睇吓書同朋友屋企人傾吓偈，唔好浪費時間喺度話人炒CP啦。」

Photo from Edan IG

Text: HolidaySmart Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）

Edan晒私訊被指小家，千字文反駁！網友大讚：講嘢有point

30 Aug 2023

MIRROR成員Edan（呂爵安）日前喺IG公開部分私訊，不過佢此舉卻被指「小家」，Edan即喺IG發千字文回應事件，反駁稱：「我唔認同做藝人就要啞忍、就要硬食」，獲唔少圈中人力撐，網友亦讚Edan講嘢有理有據！

Photo from Edan IG

MIRROR人氣極高，不過有fans自然有haters，以往Edan都曾經公開回覆網友負評，日前佢喺IG Story分享haters同佢嘅對話截圖，圖中對方直言：「好期待聽你一陣唱到走晒音」、「擦鞋擦到」等，而Edan則示範用3大金句回覆。

Photo from Edan IG

唔少人讚Edan EQ高，但亦有人認為Edan晒對話嘅行為「小家」，更直接DM佢指：「無品嘅人先會公開呢啲dm，做得藝人個個都收唔少」，Edan再次晒出對話並表示：「係dm_人就得，人哋公開就唔得，我遮名都好仁慈啦下話」

Photo from Edan IG

之後Edan更喺IG post千字文回應，佢指自己接受理性、坦白嘅意見，而公開呢啲dm只係想畀大家知做藝人收到呢啲message有咩感受，佢又表示：「我唔認同做藝人就要啞忍、就要硬食」

Photo from Edan IG

Edan IG 全文：

好啦，本身諗住開Live先講，但見有人開始擔心我冇PR，覺得我係嬲豬，覺得我個人唔humble，我惟有早啲同大家分享下我嘅諗法同目的啦☺️(白紙黑字寫低都好嘅👍🏻)

1. 你係咪唔可以俾人話啊？
其實不嬲我都好接受理性、坦白嘅意見(如果唔係我都唔會cut短talk part啦😮‍💨)，因為我都好想做好啲繼續進步
好唔好睇，好唔好聽，好唔好笑，完全係base on個人喜好，咸魚青菜，各有所好，唔鍾意係完全冇問題，我亦都好樂意接受。
但如果係直接msg我一啲人身攻擊，完全扭曲我原意嘅嘢，我就真係想講句「有心啦！」❤️

2. 你唔好理啲haters啦！無視佢Block咗佢就算啦！
其實個個都會咁講，但我可以分享一個比喻俾大家feel下其實係咩感受😂
「你俾人好大力打咗一巴落塊面到，然後身邊嘅人同你講:「算啦，由佢啦。」」
喂大佬！我塊面仲痛緊㗎喎！點無視啊！
藝人都係人，藝人都會有感受，但個世界好似禁止咗藝人有感受/表達感受。

3. Po dm出嚟好小家，好冇PR。
首先，講真，你公海_我我真係算數😂你直接msg我，但係又唔俾我公開(名都遮埋啦喎)，哩個係咩logic?😂😂
再講真，我梗係知我咁樣做有人會覺得我好小家(所以我係唔會鬧佢㗎☺️)，覺得一個公眾人物唔應該咁做。
喂！啲天皇巨星都唔會咁做啦！
你啱啊！我真係唔係天皇巨星level啊嘛🤣🤣🤣🤣

咁點解我要咁樣做呢？就係因為我想俾大家知道做偶像做藝人每日係會suffer啲乜嘢
好多人就係藉住「偶像、藝人係唔應該反擊」哩條規則而為所欲為。
而好多Artist都因為哩條「潛規則」而選擇「啞忍」，殊不知內心已經千瘡百孔，甚至情緒病。
我比較好彩，我心臟真係算強大，情緒都算係比大部分人穩定。但當我發現連我都會被哩啲嘢牽動情緒嘅時候，我想嘗試去做少少嘢，想嘗試去改變少少嘢。
我唔認同做藝人就要啞忍、就要硬食，我相信只要你唔係發脾氣，你有道理，你有禮貌地表達，總有明白事理嘅人係會明白你係會支持你。

4. 將心比己
其實老實講，街外大把唔鍾意我嘅人，但佢哋係唔會浪費時間特登走去睇我啲嘢仲走嚟dm我㗎😂😂
所以我想同haters講，你哋做緊嘅嘢，係同樣地有人會對你偶像咁樣做，而佢哋亦都會受困擾，我相信你哋都唔會想佢哋suffer。所以，己所不欲，勿施於人。
我想改變嘅嘢唔係淨係想唔好再有人嚟_我(我亦都冇咁天真覺得我咁樣講完就會冇)，而係希望大家可以將心比己，其實大家無仇無怨，冇必要製造咁多負面嘅情緒，哩啲完全係vicious cycle。
如果你哋控制唔到，發現_完我先會舒服啲嘅，咁不如你哋dm鬧完之後同我講聲：「辛苦晒，我舒服了。」咁我可能都可以當係做咗善事，唔放喺心到🙏 (當然可能你哋就係想我放喺心😂😂)

5. 總結
講咁多，其實都係想大家做人relax啲，同埋想話俾大家知其實所有人都只係一個普通人。
哩一年發覺，做人要經常開心事事順利身體健康其實一啲都唔容易，每日都有好多不幸嘅事情發生，其實好多人都過得好「苦」。
喺咁嘅前提下，點解仲要想去製造更多嘅「苦」，又何必呢？
不如真係試吓放鬆啲，嘗試欣賞多啲or用另一個角度去睇嘢，可能大家都會開心啲。
唔鍾意咪唔好睇囉，但冇必要傷害人姐，right?

最後我想講我唔係話個個人都要好似我用咁嘅方式去表達，每個人都有佢嘅自由同方法同capacity去應對，但我相信每一個人(包括藝人)都係絕對有權去有禮貌地表達自己的。

其實我個talk show就係想表達類似嘅嘢，有機會再同大家分享多啲😂歡迎大家去youtube參透下☺️

講完，感恩感恩❤️