文青又出動！台北《伍伍零-咖啡與餐》 綠化餐廳 滿滿都是乾花喔～

又係文青出動嘅時候喇！位於台北嘅尼間《伍伍零 550Cafe》，用乾花同植物做裝飾，加上淺色嘅格調，實在帶俾人十分優閒舒適嘅感覺！又係一個食得又影得嘅地方喇！原來伍伍零嘅意思係，因為綠色光波嘅中心波係長550nm，店主希望可以打造一間充滿綠意同植栽設計嘅舒適環境，所以就取其名喇！

Photo from 伍伍零Facebook專頁

《伍伍零》位於台北士林區嘅一個巷入面，相信絕對唔難搵，因為Cafe嘅外型實在太突出。突出不在於花巧，而是十分簡單嘅設計，突顯咗鬧市中嘅一點寧靜，實而不華。淺色嘅木質大門配上白色嘅門框同窗框，構成一間玻璃屋，先影翻張偽文青照吧！

Photo from 伍伍零Facebook專頁

一走進餐廳，第一眼就被滿滿嘅花海吸引住，乾花同植物滿佈餐廳每個角落，牆上有，天花板都有，令人心曠神怡啊～

Photo from 伍伍零Facebook專頁

餐桌方面，有不意外嘅木系方形餐桌同餐椅，亦有吧台同圓凳嘅組合，一個人去嘅話，可以望住窗外，思考人生或者發下呆咁。另外，Cafe亦都有舒適嘅梳化同矮檯嘅組合，不過，尼啲位，你知喇，預約咗先好啲嘅。

Photo from 伍伍零Facebook專頁

食物方面，Cafe有賣暖暖嘅三文治，當中以帕尼尼為主。尼個係餐廳嘅明星商品《費城雙重起司牛肉帕尼尼》裡面有店主特製嘅牛肉同拉絲芝士㗎！

Photo from 伍伍零Facebook專頁

除咗三文治，主餐方面，餐廳亦有提供意大利粉同飯。小編覺得比較特別嘅係尼個《貓飯》，貓飯尼個名係起源於日本嘅，喺東日本將白飯灑上柴魚片，再淋上一啲醬油一齊食。飯上面仲有一隻煎得好靚嘅太陽蛋添，配埋醃過嘅乳酪豬扒同清新小菜一齊食，好似置身於日本咁呀～

Photo from 伍伍零Facebook專頁

除咗鹹食，店內都有甜點提供嘅，例如鬆餅，蛋糕咁。

Photo from 伍伍零Facebook專頁

飲品方面，尼杯咁別緻嘅就係《盆栽奶茶》喇！

Photo from 伍伍零Facebook專頁

當然，用綠色同乾花做主題嘅餐廳，都有一啲健康嘅鮮打蔬菜汁同花茶喇。

Photo from 伍伍零Facebook專頁

餐廳主張綠化，除咗店面設計之外，都真心為環保出一分力㗎！飲品嘅飲管，係用不鏽鋼造嘅，循環再用，環保又美觀。

Photo from 伍伍零Facebook專頁

上面尼杯就係《綠野仙蹤-薄荷拿鐵》喇！打算去台灣嘅你，可以放定落to-go-list喇！

備註：餐廳提供24小時網上訂座服務，只收現金

伍伍零-咖啡與餐
地址：台北士林區福華路147巷27號（捷運芝山站出口1，步行約4分鐘）
電話：0228322110
營業時間：
星期一至五 11:00-20:00
星期六至日 10:00-20:30

Text: Holiday Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）

*本文章的圖片均經其本人或其公司授權，其他媒體不得轉載