巴黎鐵塔反轉再反轉！4款周星馳經典電影包裝手工啤酒，配香脆黃金魚皮雙重享受！

「曾經有一份至真嘅愛情擺喺我面前，我無珍惜」、「做人如果無夢想，同條咸魚有咩分别啊？」、「人生有個真正朋友的確好極，飲勝！」周星馳實在有太多經典對白，身為星爺粉絲，梗係要一講對白就即刻知道係邊套戲啦！最近小編就發現，尖沙咀一間串燒店新推玩味包裝手工啤酒，有4款星爺經典電影，超有紀念價值！另外仲有即整黃金魚皮，送酒一流！

Photo from PressLogic

一系列星爺手工啤有4款，每款都以星爺經典對白同電影場面做主題，包括《回魂夜》、《家有喜事1992》、《唐伯虎點秋香》同《食神》，單支價格為＄68。餐廳同本地手工啤品牌－麥子合作，而味道就係香檸薄荷味。喺呢間餐廳獨家發售，粉絲們必儲！我要買哂4款啊！

Photo from PressLogic

有啤酒又點少得送酒小食呢！必點推介黃金魚皮！脆卜卜嘅炸魚皮，用秘製鹹蛋黃醬，猛火快炒而成。你睇下啲鹹蛋黃醬多到呢～～食落充滿鹹香，非常香口，就算極重罪惡感都要食㗎啦！

Photo from PressLogic

勁啱送酒！如果一大班朋友嚟聚會，點黃金魚皮一定好受歡迎，大家搶住食，手快有手慢無啦～～

Photo from PressLogic

係薯條怪嘅朋友，就要試埋呢個黃金薯條，用咗同樣方法烹調，炸得乾身而中間軟綿綿，依舊濃郁鹹蛋黃香，魚皮同薯條每樣一碟呀唔該！

Photo from PressLogic

呢度除咗提供一般串燒店嘅川式串燒外，即孜然粉及辣粉，仲會因應唔同食材而配上自家制醬汁，好似有日式料理店先食到嘅「脆燒日本鰻魚」！鰻魚成隻手掌咁長，燒得焦香脆口，但肉質仍然保持嫩滑柔軟，索哂特製蒲燒鰻魚汁，好正啊～～

Photo from PressLogic

聽講日本人一向視鰻魚為補身佳品，因為含豐富蛋白質同維他命，即係食多啲都無所謂啦，一定係咁，除非唔係！（笑）

Photo from PressLogic

喺燒烤爐放上「荔枝木」，所以呢個「野味汁燒豬仔脾」多咗份隱隱約約嘅清香，份量啱哂一啖自私食！串燒就係咁樣食先方便㗎嘛～～

Photo from PressLogic

另外亦有多款新派特式燒物，例如「四式燒蠔」有四款口味，包括黑松露菌醬、蒜蓉　芝士同金黃醬。醬汁全部自家調製，非常有驚喜，黑松露菌同金黃醬更加係好罕見，鍾意海鮮嘅朋友一定要試試佢！

Photo from PressLogic

肚餓了
地址：尖沙咀亞厘士道17-19號6樓
營業時間：星期一至日 下午六時至凌晨一時

Text: Holiday Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）

*本文章的圖片均經其本人或其公司授權，其他媒體不得轉載