旺中英倫風新力軍～小編瞓身推介午餐肉雞蛋仔窩夫！陣陣鹹香超有驚喜～

By 123testing on 29 Sep 2017

旺中果然係「餓」虎藏龍，新食力一浪接住一浪～有又一間進攻喇！！

今次係係西環開到出哂名，大受一班HKU仔女歡迎嘅Grandy Mary，終於係旺角開左第三間分店喇～
個地點仲要新葵廣之稱嘅旺中～真係岩哂小編行完街就去食下雪糕、雞蛋仔！

Photo from Presslogic
位置係地下，唔係上面嘅美食街，所以大家可以揀第一站黎買左先～

裝修真係可以用冠冕堂皇黎去形容！真係好Grand好靚～走英倫嘅少女風！好似係旺角搵到個好精緻嘅小角落咁，小編都忍唔住打左張卡！Photo from Presslogic

當然要試下佢最出名嘅雞蛋仔啦～佢地嘅雞蛋仔自稱「雞蛋仔窩夫2.0｣，原來係用左英式窩夫嘅做法，中間嘅雞蛋仔會係似蛋糕嘅質感～唔會咁乾咁?口！
而且餡料又同坊間嘅好唔同！小編試左一鹹一甜都超有驚喜超鍾意！真係私心必須介紹下！

麥提莎雞蛋仔 ($25)
雞蛋仔外皮係比較脆身嘅質地，一焗起成底真係脆卜卜，而入面每一粒又好綿好煙煙韌韌～果然係「雞蛋仔窩夫2.0｣！
一啖咬落去會食到麥提莎入面餅乾脆脆，口感好正！朱古力就呈半溶狀態，但因為唔係粒粒雞蛋仔都有，平衡左個味道，食哂成底都唔會太膩！
Photo from PresslogicPhoto from Presslogic

餐肉雞蛋仔 ($25)
懷住冒險精神去試呢款，估唔到榮昇小編嘅最愛啊！估唔到有雞蛋仔變左鹹食一樣超～～～好味，超級有驚喜而且食到停唔到！
一定要襯熱食啊！陣陣蛋香滲出午餐肉嘅鹹香，真係好滋味！Photo from Presslogic
每一粒雞蛋仔都包住一粒超香嘅午餐肉，食到啲午餐肉有預先烘熱，唔會食到入面係凍冰冰！
成件事真係大滿足～Photo from Presslogic

之後當然要試下佢地皇牌嘅雪糕同埋乳酪啦～原來每一款都可以自己去揀，牛奶雪糕、意大利乳酪定兩款嘅mix～

Rocky Mountain + Italian Yogurt ($45)
因為係朱古力，如果用左Yogurt會減去朱古力本身嘅甜膩感～平衡到個味道！Photo from Presslogic

Yogurt酸酸地，加上淋上滿滿嘅脆皮朱古力，原來真係好夾～唔會死甜食到最後食唔到！
上面有兩粒微微燒過嘅棉花糖！好似有個脆皮咁，拉起又有煙韌嘅質感，真係極大嘅享受～Photo from Presslogic

Violet World + Mix Twist ($40)
岩哂一班紫薯控啊，上面灑上紫薯粉再加上一粒紫薯糯米滋～係滿滿嘅紫薯味道！底下仲有啲Oreo碎～正啊！
Photo from Presslogic

Honey Poppers 蜂蜜份子 + 3.6 Milk Ice Cream - Cone ($32)
呢款係店長推介！上面舖上蜂蜜爆珠，入面蜂蜜嘅甜超清新，唔係平時好多爆珠會有藥水味死甜個種！再配埋個3.6牛乳雪糕真係一流啊！Photo from Presslogic

除左佢地招牌嘅雪糕、乳酪同雞蛋仔外，仲可以買杯飲品解下渴～
瑰魅白桃 ($29)
係玫瑰同白桃嘅梳打，飲落清甜～上面仲有粒粒散發住陣陣玫瑰香嘅玫瑰啫喱。
魅力王子 ($29)
上面杯野飲仲有個老公，岩哂情侶黎買一人一杯～呢個係柑同檸檬嘅梳打，酸酸地好解渴嫁～Photo from Presslogic