港男組飯局P圖改單呃飲呃食懶人包！用小紅書相扮食家，照抄食評

By Jennifer on 17 May 2024

Digital Editor

今晚食乜餸：小二，嚟一碟花生！

近日傳媒人千頌C喺Facebook發文分享身邊朋友嘅一件真人真事。有人自稱係富三代，專約專業人士到富豪飯堂用餐，佢以自己同餐廳好熟為由組局，由於飯局係AA制，佢會向出席嘅人士收取餐費，但被揭竟P圖改圖，收多$1萬，令其他人被迫「資助」佢食飯！

Photo from 千頌C Facebook

千頌C指佢身邊有一班識飲識食嘅朋友，號稱「老饕」，會一齊book餐廳嚐美食，老饕圈子雲集咗醫生、律師、Banker等專業人士。其中一位「B君」自稱係阿聯酋航空機師、攝影師兼富三代。

Photo from 《大叔的愛》劇照

B君活躍於香港兩大FB飲食群組，，佢自稱同餐廳好熟，所以往往都由佢book餐廳組飯局，千頌C表示：「好多時佢找數後都唔公開張單，就咁叫人俾返一個銀碼佢，大家都不虞有詐。」

Photo from 《大叔的愛》劇照

千頌C分享B君最近一件事跡，B君一行12人book咗一間富豪飯堂，事後佢就指餐費位位$4,700，並罕有咁send咗張單出嚟，埋單竟要$5萬幾，千頌C指：「咁呢班識食之人，食米係知米貴，但覺得冇理由咁貴，所以有個真熟客，走去問餐廳張單幾錢，一問就知，發現$45000有找！」

Photo from TVB

如果B君陰謀得逞，佢唔止可以食到免費餐，更額外賺$11,000！可惜佢淨係P咗總數，但成張單加埋總數係唔對數。之後老饕圈子開始回顧B君之前嘅小手段，指佢曾book尖沙咀一間米芝蓮星級食府：「有人發現菜單上寫明，其中一碗翅加多四兩，B君以為冇人知，到上翅時就好得戚咁話：『嘩！個廚對我真係好，俾咁大碗翅俾我。』實情係大家夾錢請佢食之餘，仲要夾呢四両嘅錢俾佢搭棚扮大袋。」

Photo from 千頌C Facebook

Photo from Facebook群組「香港 Omakase おまかせ關注組」

又有一次B君book咗中環一間頂級私房菜組局，佢指：「啲海膽係我親自揸飛機日本飛過嚟，俾師傅來料加工。」要求出席飯局人士要另外夾返幾千蚊畀佢，但事實上該餐廳從不接受來料加工。

Photo from 《奔愛》劇照

千頌C表示B君「富三代、機師兼攝影師」嘅身份好有可疑：「係咪富三代我check唔到，但佢話自己係Emirates機師，我拎佢英文全名去問Emirates，官方回覆係：『Emirates can confirm that we do not have an employee by this name in our current or previous records.』至於攝影師呢，有十萬會員嘅Omakase關注組Group主，最新踢爆佢IG啲相來源好多都係小紅書了」

Photo from 千頌C Facebook

之後有參與「四両魚翅」嘅苦主亦現身分享被騙經歷，佢稱B君為「千曦B大神」，苦主指：「$14580六位的飯局，另外自帶了兩枝洋酒，而餐廳的開瓶費為四百元正一支，連茶芥和加一服務費，即共約$17248。(Ref: Openrice capture茶錢於2023年為40元一位)每位晚餐是盛惠$2875。吃畢再去Kaboom各喝了一杯cocktails，誠惠$128+10%，吃連飲就是$3015。」但千曦B大神最終向每人收取$3,150元。