台北可愛卡通造型蛋糕 戚風蛋糕＋麻糬乳酪蛋糕 唔忍心食啊喂～

又一間打卡Cafe喇！位於台北中山區嘅尼間Cafe，吸睛嘅地方就係相似度非常高嘅造型蛋糕喇～仿照唔同卡通人物整成嘅蛋糕，真係非常可愛㗎！除咗造型蛋糕，cafe都有賣其他鹹食嘅，例如，意大利粉、咖喱飯同輕食等等。

下面個啲就係初米造型蛋糕喇！仿真度真係好高㗎！有迪士尼人物，仲有宮崎駿動畫系列，仲有可愛柴犬啊媽咪！
Photo from 初米咖啡Facebook 專頁

下面個兩個係非常受歡迎嘅怪獸公司主角，大眼仔同毛毛喇！毛毛就係伯爵戚風蛋糕，用咗英國著名賣茶品牌TWININGS嘅伯爵茶葉整㗎！而大眼仔個個就係抹茶紅豆戚風蛋糕喇！小編覺得如果佢可以整埋阿boo就好喇！
Photo from 初米咖啡Facebook 專頁

尼個個樣非常無辜嘅可愛龍貓就係芝麻戚風蛋糕喇！另外亦都有芝麻乳酪蛋糕。
Photo from 初米咖啡Facebook 專頁

伸曬脷嘅尼隻柴犬就係柴圓滾滾白摩卡野莓乳酪蛋糕喇～聽個名都流曬口水喇～
Photo from 初米咖啡Facebook 專頁

尼隻鋼牙就係估你唔到嘅香濃花生麻糬乳酪蛋糕喇！相信係因為鋼牙平時都係食果仁類嘅，所以就選擇咗花生味喇！唔鍾意花生嘅小編雖然無咩興趣，但係花生控嘅你一定要試下喇！因為平時都好少見同埋佢係用咗台灣新竹嘅名產福源花生醬做㗎～
Photo from 初米咖啡Facebook 專頁

仲有抹茶黑糖麻吉乳酪味嘅三眼仔同覆盆莓優格乳酪味嘅勞蘇啊～
Photo from 初米咖啡Facebook專頁

哇～仲有聖誕特別版，聖誕帽好得意啊～下面個隻貓就係小編最想試嘅泰式奶茶麻糬乳酪蛋糕喇！泰式奶茶＋麻糬＋乳酪＝小編最愛！
Photo from 初米咖啡Facebook 專頁

除咗可愛嘅造型蛋糕，仲有尼兩杯糖果色嘅沙冰。藍色個杯叫做盛夏天空，好似飲緊成個天空落肚咁啊～粉紅色個杯叫做莓好蕉情。好夢幻啊～
Photo from 初米咖啡Facebook 專頁

鹹食方面，Cafe有賣意大利粉同咖喱飯，小編覺得尼個好特別好得意嘅叫做BlueMountain豬排咖喱飯。個blue mountain真係分咗兩隻色㗎！
Photo from 初米咖啡Facebook 專頁

初米咖啡Choose Me Cafe
地址：台北中山區錦州街423之1號（捷運中山國中站出口，步行約4分鐘）
電話：0225033386
營業時間：
星期一至五 10:00-21:30
星期六至日 09:00-21:30

Text: Holiday Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）

*本文章的圖片均經其本人或其公司授權，其他媒體不得轉載