肉餅新食法！大圍爆漿芝士肉餅漢堡包，仲有勁流心蛋沙嗲牛角包！

餐廳除咗基本要好味，有時候研究啲新潮有趣嘅菜式都可以吸引食客，帶嚟新鮮感～～好似大圍呢間肉餅專門店，真係夠哂創意，出名有幾十款肉餅款式，龍蝦肉餅、花膠肉餅、黃金肉餅等，你無諗過嘅配搭都有！而最近又有新野推出啦～～包括極邪惡爆漿芝士肉餅漢堡包、流心蛋沙嗲牛角包同吉列肉餅，全部都想試啊！

Photo from PressLogic

夾住肉餅嘅漢堡飽真係第一次食，配料唔多，有生菜同蕃茄，但對於食肉獸嚟講，呢啲一啲都唔重要啊！因為最重要都係中間塊肉啊！用咗芝士肉餅代替平時嘅漢堡扒，你睇下幾厚～～仲大塊過外面個包，所以食落啖啖肉，一咬仲咇哂芝士出嚟～～減肥？食哂呢個包，聽日先開始啦！

Photo from PressLogic

肉餅煎到底面香脆，但中間又唔會乾，一啖食落去，滿口都係肉嘅感覺真係好幸福啊～～

繼續食包唔好俾佢停，一齊食包包食飽！呢個係沙頭角啲friend－沙牛角！其實即係牛角包夾住沙嗲牛肉，夠哂港式口味，不過最吸引都係中間個太陽蛋！

Photo from PressLogic

咬一啖個太陽蛋即刻爆開，流心蛋黃湧哂出嚟，蛋黃仲令啲沙嗲牛肉入口更加滑，勁惹味～～

Photo from PressLogic

出新野又點少得肉餅呢～～呢個吉列肉餅，參考咗日式吉列嘅烹調方法，將肉餅炸到通透，卜卜脆，每一啖都聽到chok chok聲！怕熱氣咪配個菜飯一齊食囉，好似會將邪惡感降低啲，又可以中和吉列肉餅嘅油膩！

Photo from PressLogic

傳統吉列炸物都會跟個甜甜酸酸嘅醬汁，加埋一齊食，成件事先夠夾！呢度當然都跟到足！有趣玩味嘅食法係自己唧醬汁，寫字又得，畫公仔都得，又幾有趣喎～～唔知有無男士會用嚟示愛呢？（笑）

Photo from PressLogic

雖然呢個唔係新野，不過介紹開啲熱氣邪惡食物，都要講下手掌咁大嘅炸雞脾！雞脾啖啖肉，肉質又嫩滑，係香港人下午茶最愛食物之一。唔同傳統炸雞脾，呢度用咗台式炸雞排方法，食落更加香脆，但又唔會油淋淋

Photo from PressLogic

唔係講笑，真係有手掌咁大隻㗎！下午茶食一隻都夠飽肚！

Photo from PressLogic

食咁多炸野，飲杯冰凍啤酒就gur返哂～～大圍分店限定日本Asahi 大生啤（500ml）只售$28，咁大杯都係$28會唔會太抵！仲要夠冰凍，好爽啊

Photo from PressLogic

Photo from PressLogic

肉餅哥小炒料理
地址：新界大圍美田路30號
其他分店：荃灣聯仁街28號康睦庭園地下3號舖‬
營業時間：07:30-17:30 18:00-22:30

Text: Holiday Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）

*本文章的圖片均經其本人或其公司授權，其他媒體不得轉載