維園之外的選擇！中環首個戶外年宵，有得食有得玩仲有音樂聽～～

過咗新年，話咁快又到農曆新年，諗好咗去邊玩未呢？除咗去拜年，指定動作一定係去行！年！宵！周圍都有大大小小嘅年宵，最大型一定係維園，不過年年賣嘅野都好似差唔多。想有啲新意？你可以嚟中環第一年舉辦嘅戶外摩天輪年宵，有好多知名小食係度擺檔，仲有band show睇，節目精彩，一改傳統，岩哂年青人！

Photo from FEEDHK

1 月 24 - 27 日期間，由FEED主辦嘅中環年宵2.o將會係中環摩天輪舉行。年宵劃分咗生活品味區、餐飲美食專區、乾貨區 、酒吧暢飲區同互動遊樂區，唔同種類嘅攤位等大家可以又食又玩仲可以辦埋年貨，入場費全免。有唔少潮牌都係度擺檔，好似有買野一啲都唔自私嘅杜如風同拍檔Calvin Tsoi搞嘅服裝品牌Fungolia、超有格調嘅傢私品牌Homeless、仲有李璨琛有份主理嘅漢堡店Boomshack，夠哂潮！

Photo from fungolia

Photo from boomshackhk

另外小食店都來頭唔少，近30個攤位岩哂識飲識食嘅你，例如有「十八座狗仔粉」可以食返碗暖笠笠狗仔粉同火鴨翅，又有旺角無時無刻排哂長龍嘅「肥姐小食店」細仔開嘅分店「第三代肥仔」，會帶嚟新鮮爽口嘅港式滷味，大飽口福啊！

Photo from FeiJieXiaoShiDian

開幕同閉幕仲請咗重量級嘉賓LMF同Supper Moment表演，1月24日（20:30）有LMF rap住開幕，而1月27日（22:30）有Supper Moment 陪你倒數迎雞年，有show睇嘅年宵都係第一次見！

Photo from FEEDHK

現場仲有個拋彩虹遊戲攤位「雞不可失」，獎品總值過百萬，包括日本及東南亞來回機票、至潮電玩、燦嫂燕窩名貴禮盒、Marimekko精品等等，行個年宵都隨時中獎！

Photo from FEEDHK

Photo from ButterflyHotelsHK

中環年宵2.0
地址：中環民光街33號
開放時間：1月24日(年廿七) 上午11時至下午6時
1月25至27日(年廿八至年三十) 上午11時至晚上11時

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）