![何太自爆欲離婚改嫁到美國!僅2個月即露真面目,何伯老淚縱橫感後悔](https://image.presslogic.com/holiday.presslogic.com/wp-content/uploads/2024/07/96b08f98.png?auto=format&w=718)
何太自爆欲離婚改嫁到美國!僅2個月即露真面目,何伯老淚縱橫感後悔
何伯何太因為$450萬一度成為全城熱話,雖然何太成眾矢之的,但佢卻趁機開直播及粉絲群,似乎想走「網紅」路線。未知係咪攞返$450萬無望,近日何太開直播時疑露真面目,不但大聲呼喝老公何伯,更直言想離婚改嫁到美國,仲話會叫何伯做管家,鏡頭外何伯聞言忍唔住喊!
5月初,何伯何太上《東張西望》控訴何伯細女將何伯銀行戶口$450萬全部攞走,不過節目播出後網民幾乎一面倒力撐細女,反指何太居心叵測。之後何伯何太多次參與《東張西望》錄製,反駁網民並力證夫妻恩愛。
同時間,何太抖音帳號被爆,佢順勢公開真容,更不時同老公何伯開抖音直播,又開設多個粉絲群組,更初試直播帶貨,不過何伯何太堅持唔會放棄取回$450萬,更揚言會去銀行示威。
事隔兩個月,唔知係咪眼見攞錢無望,何太直播時「露出真面目」,何伯入鏡時即推開對方,何太怒斥何伯:「做乜被人影到你!」何伯稱要攞嘢,何太指:「你兜過去攞唔得咩!你係咪教唔精呀!」並用凌厲嘅眼神望住何伯。
近日何太再開直播,有粉絲提議佢改嫁去美國,何太竟表示如果未來老公唔嫌棄佢帶埋老公同兒子,咁佢都會離婚改嫁,更指會叫何伯做管家:「以後我少請一個管家,讓我現在的老公當我們的管家。」
鏡頭外何伯突然聽聞妻子想改嫁,仲要佢做管家打雜嘅消息,即生氣道:「你估我唔識聽呀?」何太稱:「你沒錢我能帶你出國嘛。」何伯表示嗰啲錢會攞返返嚟,然而何太似乎唔相信佢:「你攞返返嚟先算啦!」何太坦言無錢以後就照顧唔到老公何伯。
之後何伯更老淚縱橫,何太直言:「你無能力就要認㗎啦!」何伯心痛表示:「你知唔知我個心有幾痛!我以為搵到個真心對我嘅老婆。」何太安撫何伯稱係無辦法先會諗離婚改嫁,如果筆錢攞唔返,為咗生活何伯有得做管家都叫有份工。
但何伯無被安慰到:「我睇住個老婆同人上床,我幾難頂呀?」更表示結果何太改嫁佢「無晒面」,唔少網民感歎僅2個月,何太就暴露出真面目,不復昔日出行十指緊扣嘅恩愛甜蜜,直言「貧賤夫妻百事哀」,不過亦有網民認為何伯何太只係做戲,因為見事件討論度漸漸變低,為咗熱度不惜扮嗌交製造話題。
Text: HolidaySmart Editorial
(小編公告:如果讀者有任何關於美食、旅遊、玩樂、或者任何新奇有趣事物既資訊,都歡迎話比小編們知~大家可以透過Facebook inbox、或者send e-mail到holiday@presslogic.com,直接將資料傳比小編)