港男持20張A4影印「月餅券」換餅店主無奈報警網友：去印銀紙仲直接！

By Macy Sun on 08 Aug 2024

Digital Editor

中秋將至，不少人都開始準備攞「月餅券」到餅家換月餅。然而近日竟然有一名港男，手持20張A4之影印本「月餅券」到長沙灣一家餅店換餅，令店員相當無奈笑指男子呃都呃得「唔專業」，最後決定報警處理！

Photo from Crystal House水晶屋 FB圖片

近日零食雜貨店「Crystal House水晶屋」在社交平台發帖，分享其長沙灣分店近期遇上一宗「超低能勁搞笑」騙案！據指涉案當日分店閉路電視拍到，晚上有一名男子拿著20多張「貓山王榴槤冰皮月餅劵」的彩色影印本前往分店兌換月餅。從店鋪提供的照片可見，「月餅券」全為A4紙彩色影印本，而據店方專頁編輯引述職員指男子操純正粵語，「我同事話佢好正常！仲打電話畀佢朋友確認吓」，又形容對方有「親切眼神同埋笑容」。

Photo from Crystal House水晶屋 FB圖片

店方專頁編輯亦在貼文中直言第一次見如此大張的月餅券，「今日肯定係愚人節，呢個客人好慘，肯定係畀益友整蠱」、「冇印仔、又冇Number（號碼）！又冇背面」、「大佬呀！臨時演員都係演員，專業少少得唔得呀。你影印本都麻煩剪一剪返張券個樣出嚟啊」，更坦言笑到肚痛，同時亦補充指店員見狀當時選擇報警處理，但對方已離開。

Photo from Crystal House水晶屋 FB截圖

貼文曝光後，就有網民留言質疑男子會否亦是被騙，不過專頁編輯就回覆指「呢個係一個謎，但佢最後20多張券冇攞走！大家應該心中有數」。另外有大批網友就笑言：「大癲，剪都懶得剪」、「比返個影印本月餅佢」、「彌足珍貴值得珍藏絕版」、「下次不如直接印銀紙，咁想換咩都得」，亦有人要求店方下次要及時阻止對方離開，以免有更多店鋪中伏。