姜濤為「冇品」言論道歉 Edan稱雙方未能達成共識床哥即晚鞠躬道歉！

By Macy Sun on 29 Nov 2024

Digital Editor

床哥抽水事件愈演愈烈，繼日前床哥再開直播就「抽水事件」回應，提到與Edan（呂爵安）有開玩笑共識，但暗串姜濤「衝出嚟」後，Edan及姜濤昨日（28日）出席活動就有再度回應。當中Edan表示與床哥未能達成共識，而姜濤亦為直斥對方「冇品」一事道歉。至於床哥亦有即晚現身鞠躬道歉，希望事件盡快平息！

前情：

1.叱咤2024｜床哥@JFYT為拉票抽Edan水姜濤撐兄弟留言：冇品！

2.Edan現身回應床哥抽水事件姜濤繼續義氣撐兄弟：唔係一句講笑就冇事？！

Photo from 影片截圖

床哥抽水風波愈鬧愈大後，前日（27日）晚上床哥連同JFFT成員以及YT周殷廷就有再開直播回應。期間他就表示一直有通過YT與Edan溝通，而至於被姜濤指「冇品」一事，床哥就指懷疑對方未有了解清楚，沒有跟隊友溝通「唔知頭唔知路」。床哥又表示有留意到相關訪問，並反擊姜濤「大家可以了解多啲」的言論，反指這句說話同樣適用他本人身上，僅僅拋下一句「冇品」，就讓事情一發不可收拾，並反問一句「我係咪就要硬食？」，令此次風波再度引起熱議。

Photo from 影片截圖

而對此昨日（28日）Edan及姜濤出席公開活動時就有再開腔回應，Edan指事件後曾與對方及YT溝通，而床哥前日的直播他亦有觀看，坦言溝通時已表達想息事寧人、不會對床哥有負面想法，因不想嘈交、已釋出最大善意和下台階，但表達過後，對方如何去處理是其自由，無法干涉對方怎麼做。Edan更表示留意到對方的社交網名稱加上字眼（有品），以及就事件作回應，坦言對方給他的感覺較「硬淨」，是堅持原則，但：「佢同我立場有少少唔同，未達成共識，係有少少可惜。」

Photo from ViuTV截圖

Photo from Edan IG

另外被問到遭抽水有何感受時，Edan就坦言的確有覺得不舒服：「當時對方喺直播談及我嘅私事，我接受佢係無惡意及講笑，但唔代表影響唔到我，無對我做成傷害，我的確覺得唔舒服。講到粉絲為我拉票、但我去放假，而影響到我本人、我粉絲，以及我同粉絲嘅關係、同外界對我嘅睇法。我喺電話中有表達呢件事，想用成年人、成熟嘅方法處理，開玩笑好難拿捏，我都會開玩笑、激嬲到身邊人，將開玩笑放喺高地，我講笑你認真咗、會玩不起，被玩嘅人都會有感受。」

Photo from Edan IG

至於姜濤亦表示有觀看床哥直播，並為留言直斥對方「冇品」一事道歉，指：「我會更加了解我哋之間嘅嘢，佢覺得開玩笑啫，無做成傷害，但而家有，我哋承認佢係無惡意，以後大家將心比己，要尊重所有人。佢覺得我講冇品佢會唔舒服，對唔住，如果俾我揀多次，我會用溫和啲嘅字眼，我已經道咗歉，佢接唔接受，我都尊重佢，佢道唔道歉都係佢嘅選擇。」

Photo from ViuTV截圖

Edan與姜濤再度回應後，即晚床哥就以《愛與和平音樂會》為題開直播講出連日來的感受，表示自己做事向來For Fun為主沒打算搞出紛爭和矛盾，並表示接受姜濤道歉。床哥同時表示連日來，傳媒不斷報道事件，佔用了不少社會資源，本應有更多有意義，有需要的事情去報道，「我自己亦是為這兩日，佔據咁多版面，製造咁多紛爭，我亦深受抱歉。」隨後便在鏡頭前作90度鞠躬，希望事件就此結束，告一段落。然而事件連日發酵爭議不斷，評價各有不同，還請各位讀者自行判斷～