懷舊傳統餅店PartII 深水埗x永不退減懷舊潮 豆多黃糖香砵仔糕

依家嘅零食真係款式多籮籮，有時都真係幾有創意，小編不得不佩服佩服。不過，陳年懷舊嘅食品仍然存在於世上，當然係有佢嘅生存價值喇～今次又介紹一間懷舊餅店喇～總有一間岩你口味嘅！

Photo from PressLogic
今次尼間位於深水埗北河街嘅《生隆餅家》，其實都出咗名㗎喇～小編今日一於去試下龍與鳳！餅店有個大大嘅招牌，黃底紅字，俾人傳統嘅感覺。餅店有位熱情好客嘅姐姐招攬客人幫襯
Photo from PressLogic
左邊放咗各式各樣嘅糕點
Photo from PressLogic
右邊亦有唔同嘅乾糧任君選擇。
Photo from PressLogic

對小編黎講，傳統糕點嘅表表姐絕對係砵仔糕！其實係因為小編鍾意食的說～尼度嘅砵仔糕有正常size之餘，仲有一盒8舊嘅迷你砵仔糕賣。而且，真心好平，＄10就有一盒。砵仔糕真係好多豆，仲非常香黃糖味，雖然如此，但對小編黎講絕對唔會過甜。質地亦好彈牙，唔會粉亦唔會啫喱嘅感覺。不過相對黎講，迷你砵仔糕就少豆咗少少喇～如果好似小編咁口痕想食下砵仔糕嘅糕底。
Photo from PressLogic

除咗砵仔糕，相信芝麻糕都係大受歡迎嘅一種。尼度嘅有一塊塊切到pizza形狀嘅芝麻糕賣，亦都有一盒盒嘅芝麻卷賣。小編今次就試咗芝麻糕，意外地非常重芝麻味，好似食緊固體芝麻糊咁。芝麻糕彈牙而實在，實在令人回味。
Photo from PressLogic

有無喜歡蓮蓉嘅弟兄姊妹？尼個蓮蓉燒餅（＄10/4件），不得了，燒餅皮好煙韌，唔會太厚而蓋住蓮蓉嘅味道。蓮蓉亦都好滑身。
Photo from PressLogic

而且，絕對唔係咬開得一條線嘅蓮蓉，而係好多蓮蓉餡㗎～
Photo from PressLogic

尼個唔知大家有無聽過呢？叫做雞屎藤嘅茶果，係用雞屎藤葉汁液加片糖做成嘅。不過小編覺得有少少失色，口感粉咗少少。（＄10/4件）
Photo from PressLogic

除咗糕點之外，乾糧都好多選擇㗎～小編揀咗尼個光酥餅，一樣好食！仲有小時候最愛嘅肚臍餅，細個最鍾意食咗個餅先，再食上面個糖霜～
Photo from PressLogic

尼種老餅店真係買少見少㗎喇～即管去試試，睇下岩唔岩自己喇！

《生隆餅家》
地址：深水埗北河街68號地下（港鐵深水埗站A2出口，步行約2分鐘）
電話：23601359
營業時間：星期一至日 0700-2000