張家輝被進擊粉絲追簽名合照即場苦口婆心訓話：咁大個仔唔好咁樣！

By Macy Sun on 11 Apr 2025

Digital Editor

張家輝近期為第四部自導自演作品《贖夢》積極宣傳，積極四出謝票宣傳。然而近日宣傳期間就出現小插曲，一段張家輝「鬧人」片流出！當中疑似是有進擊粉絲向張家輝追簽名合照，被拒絕後作出極端行為，最後遭張家輝即場「訓話」？！

Photo from Threads@choi_san_keung

近日Threads上流傳一段張家輝向粉絲訓話的片段，影片疑似是在張家輝完成電影宣傳後，在停車場準備上車離開時拍攝。當中見張家輝坐於車上被數名粉絲圍起要求簽名和合照，而隨即就聽到張家輝向粉絲訓話︰「有時做我可能真係簽唔到名，拍唔到照，你唔可以唔接受呢啲情況，即係我每次都要同你去做晒所有嘢先咩，你支持我我好多謝你，但你每次好極端咁，我一定要咁我一定要咁我……又唔可以一定，你咁大個仔，出嚟社會經歷好多嘢，都係需要有啲唔係一定，係咪呀？」

View on Threads

>>原影片<<

然而該名進擊粉絲就似仍然急於表現自己的忠誠度，一直表示自己有看過張家輝的戲，不過就遭張家輝搶著回應：「我唔想聽你嗰啲你睇過我啲咩嘢，我要你知道你自己咁大個仔唔好咁樣，人哋話做唔到你嗰啲嘢你就發狂啦喎，我哋喺社會做嘢成日都會碰到一啲唔如意嘅事，唔可以一啲唔易嘅嘢我哋就發狂。」隨後又再三向該名粉絲確認對方是否已經明白，才肯為其簽名。

Photo from Threads影片截圖

張家輝此段苦口婆心訓話片曝光後引來極大關注，大量網友都大讚張家輝用心，儘管遇到極端粉絲都不厭其煩，花時間勸戒對方：「其實好少人願意為着對方的好處講啲真實嘅話，更何況係一位明星，同一個完全唔識嘅fans。靚仔、演技好、有才華嘅明星周街都係，數都數唔清，但係價值觀咁端正，又真心着緊人嘅明星真係唔多…」、「家輝哥真係超溫柔超caring嘅全民爸爸」、「係爸爸教仔咁，明明可以講句唔簽就上車走，仲咁苦口婆心，feel到好肉緊想對方聽得入腦！」等。