鰂魚涌正宗台式蛋餅 真心台灣味 仲有蔥油餅同黑糖奶茶添啊～

有無鍾愛台灣菜嘅friend子啊～小編每次去完台灣旅行，番到香港都會好掛住台灣夜市同早餐店的說～香港其實都有好多專食台灣菜嘅餐廳嘅，不過食台式早餐店嘅早餐，你又見過未呢？

今次要介紹你嘅就係尼間位於鰂魚涌嘅《小倆口》喇！其實《小倆口》係黎自台灣嘅，香港店主以特許經營嘅方式經營～ 《小倆口》都營運咗好幾年㗎喇，之前係喺荃灣開店，其後搬到天后，一年前就再搬到依家嘅地址鰂魚涌。雖然經歷過幾番嘅搬遷，但店主仍然堅毅不屈，好想將台式蛋餅喺香港發揚光大。而現任店主其實係前店主嘅朋友，眼見自己嘅朋友差啲要放棄尼門生意，就二話不說轉手，幫佢繼續經營。
Photo from PressLogic

好！去番正題先，主要賣蛋餅嘅《小倆口》，小編黎到當然就要試試佢喇！首先有尼個“食蛋餅唔食尼啲料仲係唔係食緊蛋餅”嘅肉鬆栗米蛋餅（跟餐HKD$48）喇！小編最愛肉鬆加埋爽口嘅栗米，口感一流，唔會太寡啊嘛！
Photo from PressLogic
好足料㗎真係！睇下幾多肉鬆～
Photo from PressLogic
幾多栗米～
Photo from PressLogic

特別啲嘅有店主強烈推介嘅薯餅芝士蛋餅（跟餐HKD$48）喇！雖然感覺上好肥，但又真係幾正播～脆脆地又有芝士嘅黏口。加上佢地用純正台灣醬油膏開嘅醬汁，認真係台灣味啊gosh！
Photo from PressLogic
知道每個人對於好食嘅定義都唔同，講到蛋餅皮嘅脆卜卜程度，就因人而異喇！店主好貼心咁可以根據客人想要脆啲定淋啲去幫你煎㗎～

除咗蛋餅，仲有小編每次去台灣夜市必買嘅蔥抓餅啊！小編上次就試咗加蛋喇～不得不讚嘅係佢地塊蔥油餅一啲都唔會太油！最怕蔥油餅食完成嘴油，好似搽咗lipgloss咁。而且仲煎的好脆，好好食啊！（跟餐HKD$48）
Photo from PressLogic
成塊蛋係後面，正啊～
Photo from PressLogic

唔夠喉嘅話，可以試下佢地嘅漢堡。小編上次就試咗總裁牛肉漢堡（跟餐HKD$78）喇～牛肉仲係店主佢啲自己打的呢！
Photo from PressLogic
而且個漢堡包仲加咗啲甜甜地嘅醬添㗎～個蛋亦都煎得好好啊，有溏心蛋嘅feel！套餐仲跟薯角添啊～
Photo from PressLogic
而且每一個套餐係跟一杯飲品，小編上次試咗非常有台灣味嘅黑糖奶茶。黑糖味重且甜度剛好就唔洗講喇，仲要佢係無冰得黎都夠曬凍，唔怕耐咗會被啲冰沖淡咗啲甜味喇！真係似足台灣嘅飲品啊！另外亦可以選擇水蜜桃茶的。
Photo from PressLogic

唔好以為佢細細份咁，其實都好夠飽㗎！想念台灣蛋餅但又去唔到台灣嘅你，快啲去試下喇～以往星期日休息嘅佢地，由今個星期日開始，都會為大家服務喇～

《小倆口台式漢堡蛋餅專賣店》
地址：鰂魚涌芬尼街22-46號海暉大廈地下32K號舖（港鐵鰂魚涌站B出口步行約30秒）
電話：64026976
營業時間：
星期一至五 1030-2000
星期六 1100-1800
Text: Holiday Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）
*本文章的圖片均經其本人或其公司授權，其他媒體不得轉載