超親民！中環幽默好客披薩叔叔 用心經營 用心感受

一位廚師需要具備啲咩元素先算得上係好廚師？一間餐廳係咪又淨係需要好嘅食物就叫做好餐廳呢？位於soho區，離地，係小編對今次尼間餐廳嘅第一印象。但了解後發現原來，貼地，先係尼間餐廳嘅精髓。

餐廳外圍嘅裝修真係好有外國風情嘅味道～灰色石屎加上啡色嘅磚牆。

Photo from PressLogic

餐廳雖然唔大，但係裝修簡約，一啲擠逼感都無。

Photo from PressLogic

主廚Uncle Jimmy曾經係某5星級酒店嘅行政總廚，亦喺著名快餐店做過。今年就決定自己創一番事業，開咗尼間Uncle Pizza，將自己煮食嘅熱情帶俾客人。

Photo from PressLogic

Uncle Jimmy非常熱情好客，風趣幽默，周不時就會出黎同客人傾下計，為尼間餐廳增添一種親切感，縮減餐廳同客人之間嘅距離。相信尼樣野就係令Uncle Jimmy想自己開一間餐廳嘅其中一個原因喇。

Photo from PressLogic

好的～講番啲食物先喇！先講講頭盤，小編當日就無試到佢地最多人叫嘅龍蝦湯，而係試咗好多餐廳都有，但唔一定好飲嘅蘑菇湯《Wild Mushroom Cream with Truffle Paste》。蘑菇湯入口好香雜菌味，質地並唔係一味得個滑字，而係有一粒粒菌類，好有咬口，感覺好豐富。

Photo from PressLogic

入重頭戲之前，小編嗌咗個pasta試下。尼個係《Linguine with Seared Hokkaido Scallops, Lobster Cream》，意粉醬汁係用廚師特調嘅龍蝦醬開嘅。有兩粒大大粒嘅北海道帶子，煎得外脆內保持半熟狀態，非常鮮甜㗎～而且驚喜嘅係竟然仲有一塊魚扒，魚皮煎得脆卜卜，肉質非常嫩滑，一啲都唔嚡。

Photo from PressLogic

黎到pizza喇！值得一提嘅係佢地嘅pizza麵團全部都係人手整，再放入石爐焗。

首先有尼個以主廚個名命名嘅《Uncle Jimmy》，其實即係煙三文魚pizza。Pizza好脆，咬落去好軟熟。番茄醬酸酸地，中和番煙三文魚嘅膩。

Photo from PressLogic

介紹多樣長型嘅pizza俾你知，尼個就係《Garlic Foccacia》喇！不得了，尼個pizza底真心正，好似麵包咁，好軟熟啊～成件事好充實你明唔明？

Photo from PressLogic

做過5星級酒店總廚，食物質素無容置疑，難得嘅係廚師嘅嗰份熱誠，嗰份親切感。一個咁有heart嘅廚師，相信去過嘅朋友，一定會滿載而歸。得到嘅唔單止係高質素嘅食物，仲有嗰份被熱誠所打動嘅感動，見到原來要實踐夢想，有心並唔怕遲。只能說Uncle Pizza係一間令我會想不斷再幫襯嘅餐廳。

《Uncle Pizza, Pasta & Grill》
地址：中環伊利近街25號地下（港鐵上環站E1站出口，步行約12分鐘）
電話：26832188
營業時間：星期一至日 1130-2230

Text: Holiday Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）

*本文章的圖片均經其本人或其公司授權，其他媒體不得轉載