澳門手信不再是嗰兩間嘅專利！唯愛。老字號 必試！百年老店晃記

講到澳門嘅手信，離不開就係杏仁餅啊、鳳凰卷啊咁。要買並唔難，澳門周街都係㗎喇，但係要中就難喇！邊個話官也街一定係做旅客生意唔㗎，係我地自己買黎買去都係嗰兩間大品牌姐，想方便地搵啲傳統嘅老餅家，小編有好推介喇～

Photo from PressLogic
今次介紹嘅尼間係位於澳門氹仔官也街，有百年歷史嘅《晃記餅家》。睇佢嘅裝修就已經知道佢係名副其實嘅老餅家喇！小編去到都排咗大概7、8個人位，已經見到兩次佢地拎啲啱啱出爐嘅餅落黎pack。絕對新鮮滾熱辣啊！
Photo from PressLogic

尼間餅家賣嘅絕對係老餅喇，有佢地始創嘅肉切餅。90後小編本來都唔知係咩，後尾發現原來係麵粉加豬肉，中間深啡色嘅就係豬肉喇。切到好薄一片片，非常脆！食落係鹹鹹地，有啲似雞仔餅，所以並唔係人人都接受到嘅味道黎嘅。
Photo from PressLogic
之後就係手信店點可以無嘅杏仁餅喇！佢嘅杏仁餅有幾款嘅，有素心、肉心、杏粒同蛋黃！媽咪，小編私心幫大家即試蛋黃味，佢係一塊素心杏仁餅中間有啲蛋黃餡。小編覺得食落無咁寡，唔會淨係得杏仁味，反而有啲蛋黃嘅鹹甜味。而且一啲都唔會太甜太鹹㗎！
Photo from PressLogic
跟住就有尼個盲公餅喇！聽就聽得多，但係食就未食過喇。食落比杏仁餅甜，一樣係用綠豆粉整嘅，不過唔同嘅係佢係混入咗合桃粒。比起杏仁餅再鬆化一啲。
Photo from PressLogic
最後就有尼個除咗杏仁餅，手信之皇非佢莫屬嘅鳳凰卷喇！小編揀咗紫菜肉鬆鳳凰卷，除咗好香蛋味，必須讚一讚佢塊紫菜亦都超級香，你知喇，紫菜肉鬆鳳凰卷其中一個重點就係紫菜啊嘛！而且鳳凰卷同塊紫菜都一樣好脆㗎！
Photo from PressLogic
再次去澳門不妨去下晃記，品嚐下舊式嘅澳門糕餅，買番去俾朋友做手信，都唔會俾人話你hea啊嘛！
Photo from PressLogic

《晃記餅家》
地址：澳門氹仔舊城區官也街14號
電話：+853 28827142
營業時間：
星期一至日 1000-1930

Text: Holiday Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）
*本文章的圖片均經其本人或其公司授權，其他媒體不得轉載