香港嘅日出原來係咁靚？四個睇日出必推行山徑，小心俾鹹蛋黃震撼到！
最近香港興起行山潮，係落山嘅時候，我地通常都會見到日落，大大個鹹蛋黃慢慢收細，都咪話唔壯觀！不過你又有無試過挑戰睇日出呢？雖然你要凌晨黑漆漆咁行山，但當你行到上山頂，見到個天滲啲陽光出嚟，然後太陽升起個下，真係會好滿足！
Photo from Pinterest
1. 大帽山
大帽山俗稱「大霧山」，係香港最高嘅山峰，海拔957米。以平路為主，斜度中等，初學者行都唔會太吃力。大帽山郊野公園准許車輛駛入，所以可以直接由荃灣搭的士，直上大帽山700米處的閘口，只需要大約一小時已經可以登頂。
落咗車沿直路一路上山，向山頂嘅雷達站出發，沿途道路寬闊，適合新手登頂！好彩嘅話仲可以睇到雲海添～～
離開只需要沿路落山就可以，出返馬路搭51號巴士回荃灣西站。
Photo from Pinterest
2. 大東山
除咗睇芒草，大東山睇日出都別有一番風味！大東山，原名大楝山，係香港第三高嘅山峰。由東涌出發，搭的士或者11號巴士上伯公坳，不過留意返東涌開出嘅11號巴士尾班車係凌晨0120。
係伯公坳落車，唔使過馬路，見到涼亭沿路直上就可以上到大東山，全程約三小時。睇住啲雲「染紅」變咗粉紅色，增添幾分浪漫～～
出口為黃龍坑郊遊徑，途經小村，到達赤鱲角新村再行廿幾分鐘返東涌，或者搭巴士返東涌。但黃龍坑徑出名「長命斜」，想輕鬆啲可以沿路直接行到梅窩碼頭搭船。
3. 鳳凰山
鳳凰山係香港第二高既山峰，主峰高度為海拔934米。由於地勢突出，吸引好多人去觀賞日出日落，而且較容易見到雲海。同上大東山一樣，搭的士或者11號巴士上伯公坳。不過要過對面再向前行，就會到鳳凰徑第三段嘅入口。
沿梯級上山，後期嘅路會比較平坦，背面就係大東山，遠望大嶼山南部嘅海灣，風景優美。
Photo from Pinterest
落山沿另一邊嘅碎石梯級下山，但有一點難度，好考腳骨力！途中可以望到天壇大佛同昂平嘅景色，最後去返昂平市集。
4. 清水灣田下山
田下山出名睇日出，方便易去。田下山位於清水灣半島南部，海拔高273米，難度比較低。係寶琳搭16號小巴到相思灣落車，沿相思灣山徑上山，大概三十分鐘會遇到分岔口，向大廟方向行可以觀賞到開揚嘅景觀，望到布袋澳海灣，係個個位影日出一流！
落山沿石頭階級落，到達大廟，行返出馬路可以搭16號小巴返觀塘。
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）
【想隨時隨地緊貼本地食買玩資訊？】
👉🏻 立即下載 HolidaySmart 假期日常APP
👉🏻 即刻Follow我地Instagram holidaysmart.hk
👉🏻 訂閱我地 Youtube Channel
