【復活節好去處】信和集團5大商場型格「GoCircular｜好物共享」企劃！升級改造潮物＋再生玩具＋咖啡市集

環保唔單止係慳水慳電，放假玩樂都一樣可以實踐綠色生活！今次小編有好推介！信和集團首辦跨區跨界別嘅「GoCircular | 好物共享」企劃 ，集合社企、綠色科技初創、年輕創作人同升級再造設計師等唔同界別 ，由玩樂入手，帶大家chill住實踐循環經濟！

由奧海城、屯門市廣場、灣仔利東街，一路玩到荃新天地同黃金海岸，5大商場接力推出主題市集，玩盡升級再造、再生玩具、咖啡渣手作、二手書同古著尋寶，最啱復活節安排「綠色小行程」。即刻跟住小編，睇下邊度最啱你同家人朋友！

亮點一：奧海城「共創循環」— 匯聚超型本地 Upcycler、名人二手尋寶！

小編私心推介奧海城一連六日舉辦嘅「共創循環」，鍾意 Vintage 同講究綠色生活嘅文青絕對唔可以錯過！

本地品牌互相交流：今次活動邀請一班型格本地upcycler，包括美華氏古着同緣木種子，仲有本地原創木藝品牌 START FROM ZERO ！

「緣木種子」堅持喺市區收集種子，為種子創造第二生命，免佢送去堆填區。而呢份嘅堅持，亦延伸返入佢哋嘅產品設計之中，堅持零塑膠、零金屬，連樂器張「出世紙」都係用再造紙製作。佢哋仲好欣賞大會喺活動佈置上考慮到重用減廢，真正由外到內貫徹循環理念！

另一品牌「美華氏」就以有瑕疵嘅美國古著作為主要原材料，交由本地老師傅一針一線重新設計同改裝，佢哋希望大眾明白每件 Remake 作品背後，都包含咗運輸、清潔、篩選同本地人手製作嘅心血，價值遠遠超越一般 Fast Fashion，加上古著文化獨一無二，拒絕出街同人「撞衫」！

星級尋寶天堂：好物義賣市集有陳健安、阮小儀、盧覓雪及 Yuki Lovey 等名人捐出嘅二手衣飾 ，好啱想尋寶嘅你！

日期：即日起至4月7日

亮點二：屯門市廣場「『換』樂循環」— 極罕有大型二手玩具交換！

放假行商場，都可以玩得開心又學到嘢！屯門市廣場同社企「再生玩具店」合作打造全港玩味十足嘅玩具交換市集。「再生玩具店」創辦人黎俊業表示，坊間好少有咁大型嘅玩具交換活動，所以今次家長反應超級踴躍。佢最想打破「玩具越多越幸福」嘅迷思，希望小朋友透過「一換一」嘅真實體驗，親身感受分享嘅樂趣，學識點去選擇同珍惜自己擁有嘅嘢。

大型玩具交換：以早前「收集日」換領嘅印花，或S⁺ REWARDS指定點數，即可換領心水二手玩具。

STEAM 升級再造：同場設有互動遊戲體驗區同工作坊，教小朋友用回收物料親手製作扭蛋機、機械人或籃球機，啟發創意 ！

日期：2026年4月10至12日

亮點三：灣仔利東街「啡嚐循環」— 咖啡控必去！超 Chill 市集＋咖啡渣升級再造

放假想放鬆又唔想行到腳軟，小編推薦你去灣仔利東街嘅「啡嚐循環」市集，試試本地手沖咖啡，再玩吓咖啡渣 DIY，由一杯咖啡重新認識循環生活嘅生命旅程。

特色咖啡品牌陣容：場內集結多個本地特色咖啡品牌，由經典手沖、特色風味咖啡豆，以至各類器具有齊 ！無論你係資深啡迷定係新手，都一定可以搵到心頭好 ！

綠色生活美學：平時當廚餘丟棄嘅咖啡渣，竟然可以變身成為超有質感嘅手作飾物、家居精品及植物擺設，拎返屋企做裝飾就最啱。

手作達人 DIY 體驗：「一喜種田」更會帶嚟一系列升級再造工作坊 ！教你用商場收集嘅咖啡渣，親手製作畫作、彩沙盆栽、匙扣同蠟燭等獨一無二嘅小物 。

日期：即日起至4月7日

亮點四：多區商場同步響應 — 好書義賣、天然好物市集！

荃新天地「喜閱循環」：大型讀物義賣同親子共讀同閱讀體驗活動，好啱一家大細趁假期去揀書、睇書、坐低充電。

日期：即日起至4月7日

黃金海岸商場「好物循環」：周末環保創意市集，有二手好物及慈善義賣攤位 ，仲有「一喜種田」農作物義賣同天然防蚊劑工作坊 ，行下海邊、玩吓手作，夠晒愜意！

日期：2026年4月11日

所以呢，今個復活節長假期，與其留喺屋企或者盲目消費，不如約埋閨蜜、伴侶或者一家大細，一次過玩盡多個主題市集，一齊過個有意義又夠 Chill 嘅綠色復活節啦！ ✨

Text：HolidaySmart 假期日常