【專欄分享：曲奇獸】你已經被海包圍濟州涯月追日落必到之地

By 曲奇獸 on 20 Nov 2017

畢業於旅遊業管理科但唔做旅遊，鍾意四周圍走，以迷路於城市中為平日的興趣。選擇困難症外加貪心性格，導致走火入魔盡量堅持不回訪同一地方及餐廳。

嚟到被大海包圍嘅濟州島，起唔到身睇日出都要去西邊追個日落。提到濟州觀賞日落之地，位於涯月嘅Monsant Cafe，對廣大BIGBANG粉絲絕對唔陌生。雖然本人非BB粉絲，但對於唔可以錯過GD Cafe表示不能認同更多。

早上時段先到彩虹小學，所以要再轉巴士到。實際位置只要於Google map輸入Monsant cafe即可搵到，大概都係跟住海邊同跟住人行就到...(路痴)

途中路過韓劇《心情好又暖》中的春日咖啡廳（봄날카페），據說依家暫停租借民宿，不過人數同樣驚人。如果想於黃昏時段霸定靚位，可以更早前往海邊。

已經開始要準備日落嘅天色，所以急急腳離開，錯過傳說中嘅牛奶冰同埋酒精飲品，仲錯失埋摸下入面4隻哥基嘅機會。

由Bomnal走向Monsant Cafe會先經過草叢位，兩邊種滿花草嘅小路又殺死唔少相機手機電量。(當日嚴重電量不足)

提起GD cafe 腦海首先會浮現玻璃鏡面。黃昏時間沒有打開鏡面，直接反射出海景，所以大家會好忙咁影鏡又影景，重複又重複。

實際上內裡望外可見外面各人一舉一動，走入Cafe先發現叫頭先外面拍照人士情何以堪。

明顯走工業風嘅樓梯同埋後面廢墟味濃既「被破壞」後牆，隔離係利用火山岩石頭砌出牆面，內藏黃色燈光，又係另一個影相嘅排隊位。

到夜晚時段會由大自然簡約風轉身為暗黑風格。一排樓梯下嘅紅黑鐵櫈作為裝飾，更有一種廢棄懷舊感。(總有一種戲院櫈嘅感覺)

一層空間不大，只用玻璃包圍中間的正方框坐位，最中央位置更可透過玻璃望到下面餐廳環境。

由一層望向左邊，可見Bomnal全貌，海邊位置已一早人頭滿滿，日落後先見返少少空位。

涯月海邊被稱為濟州海岸公路風景最靚位置，即使太陽落山後仍然要等到天黑先願意離開，最後齊齊好似係下白泥咁攰等既士返市區。