聖誕抽獎中伏大 真係唔好再買杯啦

又到聖誕～又到聖誕～踏入12月，又到咗荷包出血嘅時候，N咁多個聖誕派對，Ｎ咁多次抽獎呀、交換禮物呀，一年你奉獻咗幾多錢？

Photo from Pinterest

其實洗錢都唔係問題，最大問題係交換禮物，真係一個膽量大測試，唔知點解身邊總係會有Ｄ朋友送出中伏禮物、有Ｄ又唔係有心，諗住實用個個都啱用又符合Budget就買、有Ｄ就真係唔知買咩好，以下呢堆最怕收到嘅禮物，你收過幾多？（排名不分先後）

1.頸巾/手套/毛毯/暖蛋芯

聖誕節送頸巾、手套同埋細細張嘅毛毯最實用啦～依家香港去到12月都有20度，有時候仲會熱到要着短袖衫，薄嘅頸巾都話可以圍下，但手套真係搞唔掂，咁熱，點用呀？加上頸巾、手套呢Ｄ都算係服裝配件嘅一種，你未必鍾意個款色，最後都係放喺度。
暖蛋芯仲正，一送就送勁大包，醒目就送Ｄ唔使用殼嘅暖蛋芯，大意嘅送Ｄ要殼嘅而你本身冇又要買一個（唔用真係會過熱），有Ｄ貼喺個身度都好嘅，去旅行用囉。

Photo from Pinterest

Photo from Pinterest

2.潤唇膏/護手霜/潤膚露

「朋友覺得係實用」系列，抽中呢Ｄ其實唔算太伏，都有一半人會開心，因為如果係Ｄ高級牌子產品你平時唔捨得買收到就會好開心～不過有另一半人本身唔用、唔鍾意用或者自己有一堆的話，收到真係會無奈。而且呢Ｄ護膚產品其實都好主觀，因為各人有各人喜好，如果潤膚露係家庭裝，真係喊出嚟。

Photo from Pinterest

Photo from Pinterest

3.餐具

多數喺聖誕送出嘅餐具，都係好精美、一人用的飯盒餐具，仲有個靚靚袋入住，真係幾好，但問題係唔帶飯嘅人好少會自己帶埋一套餐具出街食飯，如果擺喺屋企用個袋又好似浪費咗，仲同屋企Ｄ餐具唔夾，都幾尷尬。

Photo from Pinterest

4.紀念品

有Ｄ地方嘅紀念品店都會賣形形色色嘅公仔吉祥物，頭幾次去旅行總會不由自主買番屋企然後後悔莫及，最後呢Ｄ公仔就會成為聖誕禮物，我仲記得嗰Ｄ袋鼠同樹熊公仔，你一生人會收過幾多隻？

Photo from Pinterest

Photo from Pinterest

5.聖誕擺設

聖誕節送同聖誕有關聯嘅嘢好正常姐～但係你送棵樹畀我做咩呀？雖然Ｄ擺設好靚，但抽獎嗰陣已經係聖誕，真係唔知道幾時用到...

Photo from Pinterest

6.環保袋

Tote Bag款環保袋都仲可以話係潮，但呢度講緊嘅款色，係摺埋變一個更加細嘅袋嘅環保袋，多數係去超市街市購物先會用得著，一個環保袋有排都唔會爛，咁多個袋真係純粹佔位置。

Photo from Pinterest

7.鏡

交換禮物環節全部都係女仔嘅話，抽中鏡嘅機會率超過70%，特別係掌心鏡細細塊畀你隨身攜帶，都係嗰句，十個女仔九個自己都會買，再送多個何必呢？

Photo from Pinterest

8.相架

隨住科技發達，大家已經好少會曬相，但送相架呢個傳統依然存在，仲要永遠送指定4R尺寸，有相架冇相，難怪佢係「絕交三寶」。

Photo from Pinterest

9.杯

杯杯杯杯杯，你送杯我又送杯，小編曾經試過一個抽獎裡面超過一半都係杯，自己送出去收番雙倍數量嘅杯番嚟，真係欲哭無淚，上榜「絕交三寶」。

Photo from Pinterest

10.月曆

月曆其實係實用、係有人鍾意，不過如果係即將過期嘅月曆，真係等同廢紙，佢又係全新你又冇得投訴，只能夠讚你的朋友好有創意。

Photo from Pinterest

Text: Holiday editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編～謝謝～）

*本文章的圖片均經其本人或其公司授權，其他媒體不得轉載