Philip Gandey細細個已經參與雜技團表演,仲係表演飛刀！

年度盛事友邦歐陸嘉年華再次襲港，每年AIA都會加新項目保持新鮮度，今年嘅焦點當然係聚集喺雜技團The Great Circus of Europe度啦～

Photo from 友邦歐陸嘉年華

雜技團匯集超過25位來自世界各地的專業表演者，帶嚟好多高難度嘅絕技表演，由擁有超過98年大型雜技製作經驗兼曾經喺世界各地巡迴表演的Gandey World Class Productions製作。每一次表演都要達至零瑕疵真係唔容易，更唔容易嘅係小編可以同The Great Circus of Europe藝術總監Philip Gandey傾下計，問下佢營運雜技團嘅心得！

Photo from 友邦歐陸嘉年華

Philip Gandey喺17歲嗰陣就成為歐洲最年輕嘅雜技團總監，原來佢係出自雜技團世家，唔怪得咁後生就咁有呢方面嘅才華。佢爺爺創立左Gandeys Circus ，有近百年歷史，而Philip 2歲已經做小丑，11歲嗰陣仲已經玩飛刀，從小已經接觸雜技團嘅佢去到16歲讀完中學就正式投身雜技團，對佢嚟講係理所當然，佢仲好搞笑咁話細個讀過300間學校都算係一個紀錄嚟㗎！

Photo from 友邦歐陸嘉年華

要經營一個雜技團遇到嘅困難一定唔係大家想像到，當中最難就係要連結起嚟自世界各地嘅表演者，點樣將各有特色嘅表演串連一齊係Philip每次嘅功課，經過多年努力佢成功將雜技團由家庭規模演變到英國最大型仲奪得多個重要獎項，呢個係佢覺得最開心嘅事。不過小編最好奇都係Philip點樣可以成日都諗到咁多創新嘅構思，原來呢D都係一個循環：雜技團每去一個地方表演佢就會去睇當地其他類型嘅表演，啟發佢將好多大家都估唔到嘅演出放落雜技團表演度，例如同馬一齊表演歌舞，連少林寺十八銅人都有！

Photo from 友邦歐陸嘉年華

Photo from 友邦歐陸嘉年華

作為AIA首個雜技團表演，Philip都相當重視，一年前已經開始籌備、重新編排過D表演，連場地設計都係特別為AIA度身訂造，嚟過幾次香港嘅佢欣賞香港人對文化藝術嘅接受程度，所以佢好早之前就好想喺香港演出。究竟個show有幾精彩呢？Philip就用「Amazing」嚟形容：60分鐘嘅表演一氣呵成，集驚險同幽默於一身，講到最值得欣賞嘅演出，Philip自己好鐘意小丑環節，可以舒緩下緊張氣氛，等觀眾心情平伏番佢就叫大家唔好眨眼，因為成個The Gerlings 高空踩鋼線表演係冇安全網，緊張刺激程度爆曬燈呀！

Photo from 友邦歐陸嘉年華

Photo from 友邦歐陸嘉年華

Photo from 友邦歐陸嘉年華

AIA友邦歐陸嘉年華
日期:2017年12月21日至2018年2月25日

*2017年12月21日下午5時開放
*2018年1月12日不作對外開放

地點:香港中環龍和道9號 中環海濱活動空間
門票價格:成人門票$130(包10個電子代幣)
小童(3-11歲)或殘疾人士$90(包7個電子代幣)
入場門票$40(不包括電子代幣)
年齡3歲以下，65歲或以上長者免費入場
*持有The Great Circus Europe或Billboard Radio Live音樂盛事門票者可於同日單次免費進入友邦歐陸嘉年華
詳情/訂票:http://tgec.asia/zh-hant/

Text: Holiday editorial

*本文章的圖片均經其本人或其公司授權，其他媒體不得轉載