尖沙咀梳士巴利花園落成！新野餐好地方～超浪漫！

大家有無諗住聖誕去邊度浪漫下呢？
小編就發現左一個新地方比大家～睇夜景一流！
就係尖沙咀新落成嘅梳士巴利花園啦～呢個係新世界負責嘅優化項目黎嘅～

Photo from One Bite

梳士巴利花園位於尖沙咀海濱 ,隔離係香港太空館同香港藝術館，形成一個有濃烈文藝氣息嘅空間～話到明係浪漫嘅地方，呢度當然唔係草地咁簡單，日與夜完全係兩個感覺！

Photo from One Bite

成個梳士巴利花園分為幾個區域-中央草坪、花園綠牆、環狀步行徑、表演平台同海濱台階～
每一區都有特色建築，喺風和日麗嘅下午，最好就係同一班friend嚟草坪野餐吹水「光合作用」一下，呢度好空曠加上對住維港，呼吸下新鮮空氣個人都醒神D！

Photo from One Bite

草坪附近有7組扇形木製長凳，坐喺度食嘢都一樣好relax～負責設計木凳嘅團隊話靈感係來自樹屋，部份木凳特別安排放喺樹下，咁有太陽嘅時候就可以有樹蔭遮擋陽光，亦都提供一個空間畀市民可以傾下計互相交流。

Photo from One Bite

梳士巴利公園最特別嘅地方就係將實用同藝術融合埋一齊，令成個空間都好恬靜舒適，認真留意嘅話會發現呢度冇太多燈柱，秘密就係收埋曬喺呢度-花園綠牆。

Photo from One Bite

呢個「正方粒」隱藏曬花園內嘅各種設施，好似升降機槽、大型變壓器、通風設備等，而每個格仔都有植物，入夜之後呢D格仔就會全部著曬燈，柔和嘅燈光令成個區域變得好浪漫，仲唔會影響你睇維港夜景，喺度散下步拍拖幾有feel㗎～

Photo from One Bite

燈光係公園最代表性嘅元素，一到夜晚除咗有「發光正方粒」之外，草坪嘅大圈圈「大觀園」藝術裝置都一樣有貢獻，一個個金屬圈會變成巨型光管，點亮成個中央草坪，小編建議大家可以活用呢D巨型發光圈圈，兩個人企喺度影相，好似將夜景都收藏入個相框度，呢個構圖幾靚㗎！

Photo from One Bite

另一個打卡位大家只有好「緊急」嘅時候先會體驗到，就係茅室喇～外面睇以為佢係另一件藝術品，原來佢係洗手間，裡面仲會有流水聲同雀鳥聲，每個洗手間門後面仲有圍繞「茅廁文化」嘅插畫，真係去個洗手間都好似睇緊展覽咁呀。

Photo from LAAB

仲等咩呀？聖誕快啲約定人黎呢度浪漫下啦！

梳士巴利公園

地址：尖沙咀梳士巴利道