買埋SunQ Pass指定日期無限次搭乘巴士暢遊九州

今年日本落雪比以往更多，去到邊度都係漫天雪景，一到呢D時候就會好想浸溫泉relax一下~其實九州有好多靚溫泉，喺露天風呂浸住溫泉睇迷人景色，真係人生一大樂事～小編左搵右揾，終於畀我搵到幾間景色特別靚嘅溫泉旅館，梗係要介紹畀大家啦！

風景之選:

1.龍登園(佐賀縣佐賀市)HK$2190起
福岡機場坐巴士至酒店車程約60分鐘

龍登園最出名就係睇到壯麗嘅脊振山區及嘉瀬川，擁有室內同室外溫泉浴池。呢度嘅日式會席料理全部都使用嚟自農場嘅有機食材，嚟到一定要試一試，就算自助餐都一樣咁新鮮美味。

2.鶯屋日式旅館(長崎縣雲仙市) HK$1840起
福岡機場至酒店車程約2小時25分鐘

鶯屋日式旅館位於湯量豐富嘅小濱溫泉中心位置，不過大家只要嚟過都會覺得舟車勞頓係唔會白費，因為無論係大浴場、石庭露天風呂定客房，都可以睇到一望無際嘅大海同夕陽，個人都治癒D啦～

3.青島酒店(宮崎縣宮崎市) HK$2330起
鹿兒島機場至酒店車程約1小時30分鐘

鐘意望住個海浸溫泉嘅話，呢度又係一個好選擇，酒店位於島端，可以欣賞到太平洋日南海岸，佢嘅溫泉係天然自噴溫泉，小編最鐘意呢度每間房都好光猛，望住個海即時令身心都平靜曬～

美肌/藥用之選:

1.六峰館(福岡縣朝倉市) HK$3080起
福岡機場乘巴士至酒店車程約60分鐘

六峰館有室外及室內外溫泉浴池同埋桑拿浴室，室外溫泉可以睇到庭園景色，最重要係溫泉有美肌效果，浸完皮膚又白又滑～想私隱度高D，酒店部分客房都設有私人溫泉浴池，有D房間係對住條河，夜晚好有feel㗎。

2.華翠苑(佐賀縣嬉野市)HK$2900起
福岡機場至酒店車程約1小時20分鐘

華翠苑位於九州佐賀縣嘅嬉野溫泉，呢個嬉野市中心地帶湧出嘅溫泉係日本三大美肌溫泉之一，浸過有美膚效果嘅重曹泉之後，皮膚會好似BB肌膚咁幼嫩，仲可以睇住星星浸溫泉，好浪漫呢！最近佢地仲推出佐賀A5和牛極上會席料理，人生點都要試一次佐賀和牛，睇下佢有幾好食！

3.花之別府酒店(大分縣別府市) HK$3520起
福岡機場至酒店車程約2小時20分鐘

愛美嘅女士們應該要收藏呢間酒店，因為佢嘅溫泉泉質係碳酸氫鈉，有美肌作用又可以高效保濕，所以又稱為美肌の湯、美人の湯，佢仲有個家庭湯特別畀一家人齊齊浸勁溫馨～

4.花鮎之里(熊本縣人吉市) HK$3080起
福岡機場至酒店車程約2小時20分鐘

嚟到呢度一定要浸一浸佢個足湯同埋空間感極大嘅大浴場！唔講唔知，人吉温泉泉質係塩化物温泉，有藥用功效，可以治筋肉痛、神經痛、 關節痛同埋五十肩等等，浸完一身都鬆曬。

寧靜之選:

1.雲仙溫泉東園(長崎縣雲仙市) HK$4500起
由福岡機場坐巴士到酒店車程約2小時30分鐘

旅館設有露天風呂同埋對住湖泊嘅大浴場，感覺就好似自己浸喺湖度。呢度嘅庭園都好值得大家打卡，特別係冬天嗰陣鋪滿白雪，著住浴衣影相都幾靚㗎～另外旅館料理都係焦點之一，除咗食材高質之外，連器皿都係精心挑選過，十足十藝術品。

2.摘草之宿(鹿兒島縣霧島市) HK$4940起
鹿兒島機場至酒店車程約30分鐘

摘草之宿唔單只交通方便，成間酒店只有6間客房，而且全部都有室内溫泉或露天風呂，私隱度極高，最適合唔鐘意太熱鬧嘅人，每一間房都有唔同主題，但都有一個共通點－一樣都咁寫意～

九州咁大，好多人會選擇一次過去幾個縣睇多D景點，去開日本都知道買交通pass係好重要，喺九州嘅話SunQ Pass都幾方便，三日票或四日票可以連續幾日無限次搭乘巴士，玩曬九州7個縣加下關，宜家去專業旅運就可以買到呢張Pass，一早準備好，出發就可以更加輕鬆自在啦～

更多詳情:
溫泉酒店預訂
SunQ Pass

Text: Holiday editorial

*本文章的圖片均經其本人或其公司授權，其他媒體不得轉載