Superpark 登陸香港 $180全日任玩 超過20樣遊戲超刺激

如果香港有一個樂園可以比童心未泯嘅大人同真兒童一齊競技會點呢，喺芬蘭爆紅嘅SuperPark登陸香港喇！呢個活動樂園入面嘅遊戲設施分分鐘連大人都應付唔嚟呀！

香港SuperPark位於奧海城一號銀海地下，佔地45,000平方，樂園入面分為三個國區，包括「冒險地帶」、「遊戲競技場」同「自由式殿堂」。入場玩嘅話需要先除鞋，同買一對特製襪入場，用來加強摩擦力。入面所有嘅活動都會有工作人員指導點玩，大人同細路他都唔洗擔心安全問題同唔識玩。

「冒險地帶」

「冒險地帶」比較適合小朋友玩，遊戲有攀石牆、兒童跳彈床、空中滑索、滑梯、同踏板車賽道等等。特別推介呢個超級車呔滑梯，不過就要自己拉個車呔上斜波，拉上去時都幾吃力架，但係沖落嚟速度都幾快！

然後仲有空中滑索，簡單一跳上去就會順住滑索飛過去，終點有一排障礙物等住你一次過掃底！重量方面大人玩都冇問題，照樣可以一下跳上去，開始飛索之旅！

仲有迷你賽車場，有齊大細踏板車等小朋友同大人同場競技，仲有「法拉利」揀，每人可以玩5個圈，速度方面就唔算快，但就好容易同其他人「炒車」行唔郁～

「遊戲競技場」

「遊戲競技場」就以球類活動為主，有籃球、保齡球、高爾夫球、足球，甚至棒球都有！

投籃挑戰站係籃球迷必玩嘅遊戲，玩家掉中唔同嘅盤球架就可以得到唔同分數，當然最遠最高分啦！

彈珠足球場玩法同投籃挑戰站類似，不過就係用腳將足球踢中不同的障礙物就可以拎分！

「自由式殿堂」

「自由式殿堂」就專門訓練技巧、協調同平衡力，有滑板、彈床、海綿池、攀石牆、體操場等，初學、中級或者高手都可以挑戰。呢到有大人專玩的彈跳床一鍾意玩跳彈床的朋友就啱晒了，小編跳幾跳已經散晒喇......

場內仲有一個數碼攀石場，特別之處在於結合咗AR元素，入面有幾種模式，其中一個玩家要一路攀石一路拍擊牆上面唔同的公仔圖案先拎到分，另外亦可以自訂攀爬路線來完成。

餐廳

如果真係玩到又攰又肚餓就可以出去場外的Cali-Mex Bar & Grill餐廳食飯，戴住手帶就可以在一日內隨時出入樂園，不過要留意，因為安全問題，喺餐廳飲咗酒的客人唔可以入返樂園玩架。

SuperPark Hong Kong
FACEBOOK
預訂網址：https://superpark.com.hk/zh-hk 
地址：香港九龍海輝道18號一號銀海地下 (鄰近奧海城)
電郵：enquiry@superpark.com.hk
營業時間：星期一至五: 10:00 - 21:00 ／ 星期六日、公眾及學校假期：09:00-21:00

（小編公告：如果讀者有任何關於美食、旅遊、玩樂、或者任何新奇有趣事物嘅資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）

*本文章的圖片均經其本人或其公司授權，其他媒體不得轉載