日本期間限定口味空運到港！香港都食到喇～最新奇跡鹹班戟之誕生！踩過界仲可以外賣珍珠奶茶飲住排隊啊！

嗚～～～～～次次見到日本限定咩咩咩就會表示齋睇無得食！而長期都人龍不斷嘅過江龍FLIPPERS最近就將成個日本嘅期間限定運左黎香港～同期仲新推出左鹹pancake，快啲黎試下啦！

Photo from Presslogic

Photo from Presslogic
今次係日本空運過黎嘅口味就係登登登登，岩哂冬天嘅南瓜焦糖口味啊～

奇蹟の南瓜焦糖班戟 ($129)
試過你就會明白究竟點解定價咁高都會長期咁多人蜂擁而食嫁喇～首先底個個梳乎厘班戟已經是無敵！佢個空氣感絕對唔會過重，唔會入口即融個種，係帶點綿密！而蛋香係會慢慢係口腔入面化開然後繞樑三日個種～嗚個口感真係太幸福了！

上面加上南瓜蓉，質感軟滑，南瓜味濃郁！唧上嘅焦糖唔會太多～甜而不膩！而且超級欣賞佢仲加上炒香左嘅剛果粒，咬開仲有焦糖香～有多幾重口感食落真係perfect池啊！
Photo from Presslogic

無錯佢地連忌廉都係由北海道空運過黎，脂肪比例較高～雖然好邪惡，但忌廉個質感會比較重身同帶香濃奶香～
所以建議食法要將班戟輕輕切開，沾上南瓜蓉、焦糖醬同忌廉一齊食，要感受究竟呢個班戟有幾奇蹟！
Photo from Presslogic

上面仲有個酥皮批可以點埋旁邊嘅雪糕食～好好味啊！
Photo from Presslogic

除此之外，佢地經過反覆嘅試驗，成功推出左呢個終極版嘅鹹班戟！！！

粟米牛油果班戟 ($119)
嘩！真係超豐富啊呢份，偷偷話你聽個粟米汁真係用上一整個粟米濃縮而整成，性價比真係要比足100分！另外旁邊再加上半條烤香左嘅粟米，成件事好完滿啊！
Photo from Presslogic

Photo from Presslogic

三文魚牛油果班戟 ($129)
呢款係Menu會長有嘅～雖然感覺好似同坊間熱香餅無咩分別～但食落！牛油味好香濃，而且質感軟綿，會忍唔住一啖接一啖～除此之外，仲可以揀全麥班戟做底，係用日本嘅全麥粉嫁～不過溫馨提示係實在準備太過繁複，要用上太長時間作發酵，所以係每日限定左數量嫁！
Photo from Presslogic

而呢個配搭鍾意食brunch嘅人一定唔可以錯過啦，用上superfood牛油果，再加上鮮甜嘅三文魚！真係絕配～上面仲加上蕃茄莎莎去中和沙律嘅青澀感！貼心地佢地會奉上一個黑椒酸忌廉，用三文魚黎點就岩哂！另外跟左澳洲楓糖漿可以比客人隨意淋係pancake上面食，不過小編個人覺得就咁食都已經好好味了～Photo from Presslogic

無錯啊～開店到依家仍然係見到人龍不絕，好似每次經過都係有咁多人咁！排隊排到口都渴埋就岩了～依家佢地仲推出外賣嘅珍珠奶茶，分別有三種口味：原味珍珠奶茶 ($26)、芒果珍珠奶茶 ($26)同茉香珍珠奶茶 ($26)！
Photo from Presslogic

小編飲完覺得茶味比奶味更重，而茉香個款個茶味真係會流係口腔好耐，香濃順滑～果然唔係好似坊間外賣飲品店用奶粉沖出黎嘅感覺！

而芒果珍珠奶茶飲落會好似飲緊楊枝甘露咁，芒果嘅果香都幾重，幸好唔會係好假死甜個種～值得一讚係個甜度控制得好好，無叫半糖都唔會覺得太甜！大家經過都可以試下啊～

FLIPPER'S
地址：銅鑼灣軒尼斯道500號希慎廣場6樓i.t blue block
電話：2367 2133
營業時間：星期一至日 11:00～22:30

Text: Holiday Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）

*本文章的圖片均經其本人或其公司授權，其他媒體不得轉載