天國而來的口感！你唔可以唔買嘅IG人氣店～全港首創軟熟鬆軟戚風蛋糕配煙韌麻糬！仲要低糖低油好健康啊～

小編今次又要同大家介紹少有極度高質嘅Instagram小店喇！係一間本地自家烘焙嘅戚風蛋糕小店！店名the.Mochiffon.cake就係將兩種主要材料夾埋一齊而命名，Mochi就係麻糬而chiffon就係戚風蛋糕，idea原自店主自己分別好鍾意呢兩款野食，然後無意中將兩樣擺埋一齊食發覺意外地超夾～

Photo from the.mochiffon.cake

戚風蛋糕說真的就好多地方都食到，但加埋麻糬呢個組合真係全港首創嫁，未試過嘅朋友真係要體驗下呢個咁幸福嘅口感！
Photo from Presslogic

店主仲要每次都堅持交收當日新鮮製造，所以都建議當日食就最好味，因為個有忌廉嘅關係要放入雪櫃先可以保存過夜，而水份係會慢慢被吸走！如果當日食的話，真係會感受到個戚風蛋糕超軟熟鬆軟到好脆弱但又有回彈力嘅感覺，真係要小心輕放！當然個口感亦可以享受到最MAX最顛峰嘅狀態喇！嗚～回一回味個口感我都覺得好幸福啊！
Photo from the.mochiffon.cake

唔好睇佢好似細細舊咁～其實都幾重份量嫁！呢個戚風麻糬蛋糕家族依家最新已經加到一共有六款口味喇！包括蛋香味十足嘅原味，茶味系列嘅就有焙茶、抹茶同最新嘅伯爵茶味、仲有tiramisu同最新加入充滿冬日氣氛嘅酒香紅桑子可可啊！

蛋香味配低糖士多啤梨果醬
千祈唔可以睇少呢個原味蛋白味嘅威力啊，蛋香真係唔可以忽視，超重蛋香～再加左自家製嘅士多啤梨果醬同牛乳忌廉超好味啊，兩個係採用低糖配方嫁！真係食得開心又放心～超鍾意個果醬味道！超香超重果香，而忌廉就香滑濃郁但做到濃而不膩嘅感覺！
Photo from Presslogic

焙茶紅豆 & 抹茶紅豆
超級人氣嘅分別有茶控必愛嘅抹茶同焙茶！蛋糕亦用左茶底去做烘焙，抹茶味同焙茶味都係食個蛋糕嘅時候有陣陣幽香係口中跑出黎！上面仲係抹茶同焙茶忌廉上面加上北海道紅豆，紅豆唔會太甜但更加可以帶出茶味～有宇治金時嘅感覺，成個味道好完滿啊嗚～
Photo from Presslogic

經典伯爵
而伯爵茶係叫做係新加入嘅一員！用上英國Twinings伯爵茶葉去焗個蛋糕！說真的，一打開個盒就已經聞到陣陣伯爵茶味湧出黎，伯爵茶控真係必入手！個人認為呢款個香味會比口味更加突出～
Photo from Presslogic

Tiramisu
蛋糕係整成咖啡戚風蛋糕，咖啡味好香醇濃郁～而個忌廉係被tiramisu靈魂食材意大利mascapone cheese除而代之，上面再灑上可可粉～食落個味真係同tiramisu無分別嫁！芝士香好出，食真啲仲會食到有少少酒香味！簡直可以封號為Tiramisu嘅蛋糕版啊！
Photo from Presslogic

Photo from Presslogic

壓軸要介紹嘅係新登場嘅酒香紅桑子可可！其實係原本香濃可可嘅變奏版～可可戚風蛋糕本身已經好好食，再加上用左酸酸甜甜嘅紅桑子醬！去卻左本來淨係可可嘅甜膩感，直情成功帶起左個味道！
Photo from Presslogic

想食呢間人氣IG shop就一定要留意呢個舖頭嘅IG post喇！皆因佢地每個月都係只有兩團，仲要留意住邊日開Google form要踏正10點去訂購嫁！小編表示曾經多次miss左個時間，試過04分交form都訂唔到！想買就一定要mark實佢嘅IG喇！

the.mochiffon.cake
Instagram：https://www.instagram.com/the.mochiffon.cake/

售價：
散件裝 -
$70/2 (最少每個口味訂2件，最多每人訂4件)

散水餅 -
12件起訂～可選兩款口味！

6寸原個蛋糕裝 -
宇治抹茶紅豆/焙茶紅豆 $280
香濃可可 $270
蛋香味配低糖士多啤梨果醬 $260
Photo from the.mochiffon.cake

Photo from the.mochiffon.cake

Text: Holiday Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）

*本文章的圖片均經其本人或其公司授權，其他媒體不得轉載