睇下產品點解會被列為失敗品，隨時誘發新靈感

細細個就成日聽到長輩話「失敗乃成功之母」，叫大家唔好氣餒勇於面對失敗，的確係呀，其實失敗都唔一定冇價值，好似喺紐約就有一個「失敗博物館」，將全球嘅失敗品聚集埋一齊，睇下佢哋點解咁失敗！

Photo from Failure Museum

其實呢個失敗博物館本來係喺瑞典，近期移師到美國紐約展出，喺呢個博物館裏面，你會睇到唔同類型嘅失敗之作，有公仔、遊戲、交通工具同埋新奇發明等等超過100件展品，當中包括大公司同個人發明，究竟要去到咩程度先算係失敗呢？

Donald Trump桌上遊戲
呢隻game 1989年已經推出，雖然話係好似大富翁嘅遊戲，但整體玩法同設計都好唔吸引，加上成個特朗普喺封面，真係幾趕客。呢隻遊戲係特朗普旗下產品之中最失敗嘅產品頭幾位，佢自己都估唔到銷售會差成咁。

Photo from Failure Museum

Bic for her
呢支本身其實冇問題，但佢失敗之處就係出於宣傳。當年佢推出嗰陣大正旗號話係特別為女士而造嘅筆，符合女性手形，結果產品一出引來極大迴響，話件產品真係多餘仲要買貴過普通筆，重點係嚴重性別歧視，所以最後呢支筆慘淡收場。

Photo from Pinterest

Google Glass
大家有印象的話，當年Google Glass推出嘅時候引來極大關注，但呢件產品點解會冇曬聲氣呢？原來係因為性價比非常低，加上眼鏡外型唔好睇，去戲院又帶唔到入場，仲會令一邊眼鏡過勞，所以最後銷售奇差，不過第二代已經捲土重來，希望今次唔駛「入館」啦～

Photo from Pinterest

Juicero
呢件產品真係失敗之中嘅失敗，佢係一部用嚟榨果汁嘅機，不過佢唔可以榨新鮮水果，一定要用官方生產嘅水果包（約5-7美金），變相要keep住課金畀公司，但後來財經網站踢爆原來用手就可以榨汁，咁仲要部機做乜？

Photo from Failure Museum

罐頭火雞
呢罐罐頭火雞本身就係一件失敗品，一個咁豐富嘅菜式你要塞入個咁細嘅罐，結果就會搞成咁，點食得落肚呀？

Photo from Failure Museum

沒有名字的公仔
呢隻公仔本來想打造到成為Barbie嘅對手，佢嘅造型特別簡陋係因為製造者想透過呢隻公仔教導小朋友要有關懷之心同珍惜，但隻公仔個樣太悲哀，空洞嘅眼神嚇親好多小朋友，所以最後停產了，不過好多收藏者反而想儲佢！

Photo from Pinterest

今次紐約展覽為期約兩個月，之後大家想再去睇，就要等到4月喺瑞典睇啦～

Photo from Failure Museum

The Museum of Failure(New York)

展覽日期：2017年12月2日-2018年2月4日

時間：星期三： 2-6 p.m.
星期四、五: 2 -8 p.m.
星期六、日: 12-7 p.m.（星期一、二閉館）

地址：A+D Architecture and Design Museum
900 E 4th St.  Los Angeles, 90013 United Statesf

入場費：USD$15

Text: Holiday editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編～謝謝～）

*本文章的圖片均經其本人或其公司授權，其他媒體不得轉載