仲食海底撈？地道四川火鍋大龍燚 Chef Le Mon都幫襯

自從香港開咗海底撈之後，小編最近北上都開始對海底撈熱情減退，加上成日皇帝級享受，對於食物質素都少咗追求，最近就試咗大陸嘅火鍋名牌大龍燚，夠麻夠地道，鐘意食麻辣鍋嘅朋友就唔好錯過啦！

Photo from Presslogic

未做Chef Le Mon嘅時候，謝霆鋒都已經去幫襯，絕對唔可以睇小大龍燚！

Photo from 微博@大龍燚火鍋惠州店

呢間大龍燚絕對唔可以睇小，全國已經開咗成180間，除咗規模有返咁大之外，原來仲係成都最難排到隊嘅火鍋之一，除咗謝霆鋒好多明星好似，好似係黃曉明、鍾麗緹同甘露等都都係座上客。

唔知黃曉明又會唔會帶埋老婆嚟煠吓煠吓慶祝嚟梗情人節呢？

Photo from 微博@大龍燚火鍋惠州店

Keep住好身材嘅鐘麗緹都抵擋唔住大龍燚嘅火鍋，著晒圍裙，功架十足啊！睇嚟好熟手咁啵！

Photo from 微博@大龍燚火鍋金堂店

大陸演員甘露可能無咩人識，不過係大陸都有唔少演出機會㗎，連素顏嘅佢都忍唔住係度打張卡，點可以唔幫襯試吓！

Photo from 微博@大龍燚火鍋深圳店

一坐低就會有八寶蓋配碗茶，唔好以為係免費，其實樣樣都係錢，5蚊人仔係單度已經幫你計埋。

Photo from PressLogic

仲有外形好似旺仔牛奶咁嘅芝麻油，承惠5蚊人仔，呢幾蚊唔好慳啦，因為係麻辣鍋煮完上嚟，配合油同調味，咁之有四川風味！

Photo from PressLogic

有香蔥、蒜蓉同莞茜，想要濃味嘅，記得落晒三種唔好錯過，唔夠可以再同大龍燚嘅服務員講聲，唔好怕醜！

Photo from PressLogic

大大舊炒過嘅牛油係鍋度慢慢煮溶，啲香味出晒嚟！怕辣嘅朋友仔可以善用中間1/4格嘅清湯，不過試過麻辣鍋都好難返轉頭啊！

Photo from PressLogic

辣上加辣嘅麻辣牛肉，花椒八角味非法重，再加上麻辣火鍋嘅烹煮，真係唔好睇小，怕辣嘅朋友要格外小心。

Photo from PressLogic

仲有羊肉都唔差啵，騷味就一般，不過唔會雪到硬晒，係麻辣鍋嘅引領下都變到好惹味。

Photo from PressLogic

香港唔常見但大陸火鍋一定有嘅鴨腸，一落鍋就隨時準備食，唔好碌咁耐啊，海底撈都有教7上8落就起筷。

Photo from PressLogic

鐘意鴨舌嘅朋友有福啦！9成都皮嘅鴨舌浸落麻辣鍋好吸味！雖然有少少骨位，但都絕對食得過！

Photo from PressLogic

第一次見到啲腎好似開花咁都覺得好新奇，食多幾次就見慣見熟㗎啦！鴨腎口感比較結實，開咗花除咗樣睇落吸引其實仲會吸味啲！

Photo from PressLogic

今次北上周圍食都無預咗大龍燚咁吸引，只係試咗幾款食物，下次有機會再試真啲！是次埋單都係250人仔內，想當正餐食飽啲可能就唔同講法啦！

大龍燚火鍋福田店
地址：福田區東園路51號
電話：82229902

Text: Holiday editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編～謝謝～）

*本文章的圖片均經其本人或其公司授權，其他媒體不得轉載