素食新體驗！一間素食肉食都啱嘅純素漢堡店 原來食素都可以咁邪惡㗎～

是咁的，小編雖然未至於係無肉不歡嘅食肉獸，但係叫我以後完全放棄肉呢樣野又...暫時未做到住囉～不過有時見到好多講食素嘅好處嘅文章，又或者殺害動物有幾殘忍嘅片段，真係會萌生我要食素！嘅念頭。機緣巧合間試到呢間Veggi Burger，完全顛覆我對食素嘅印象。係一間無論係咪素食者都適合嘅素漢堡店～

Photo from PressLogic

小編一直覺得食素嘅離不開都係沙律、菜、豆，即係好似牛食草咁，又覺得實食好少食唔飽。當聽到話食素burger，係覺得一定好難食～小編見識少，食素嘅次數五隻手指數得曬，去到見到啲漢堡嘅樣又覺得幾吸引啵～

Photo from PressLogic

先介紹下呢間係上年10月新開嘅全港第一，暫時黎講唯一嘅純素漢堡專門店。而今個月就有6款新口味嘅漢堡推出喇～

首先第一款，亦都係小編最鍾意嘅私心推介黑袍巨人（$68）。好想講連麵包都係純素，所以係真係所有野都係素黎的。一見到，以為塊扒係仿牛肉扒嘅味道同口感，亦都因為色澤問題，以為會好乾。

Photo from PressLogic

結果一試係超驚喜，塊扒係黑松露黑豆扒加埋黑松露沙律醬，所以係超香黑松露味，仲有純素芝士、大啡菇、黑橄欖、羽衣甘藍、番茄，真係超好食！塊扒做出黎係有啲薯蓉嘅感覺，好特別！

Photo from PressLogic

呢個望落有啲驚，綠得好健康嘅係森林守護者（$68）。不過聽咗材料之後，可能你就即刻想試喇～

Photo from PressLogic

綠色嘅麵包係班藍波菜純素麵包，扒就係自家香草蔬菜扒，加埋蘑菇片、烤澳洲茄子同羽衣甘藍。重點黎喇！牛油果醬！！！！！正野！不過純粹小編唔鍾意茄子，如果無茄子小編都會好喜歡～

Photo from PressLogic

鍾意重口味啲嘅朋友，有呢個火焰暴龍（$58），非常特別嘅係麻辣豆腐扒配重慶麻辣醬，鍾意食辣嘅朋友可以試下喇，有微微嘅辣味滲出。

Photo from PressLogic

配菜有蘑菇片、酸瓜、番茄同沙律菜，濃味嘅內餡，外層嘅包當然就係普通純素麵包啦！

日式感覺有淮山雪人（$58）

Photo from PressLogic

白松露淮山扒、烤茄子、紅毛生菜配黑松露沙律醬，點睛嘅有香煎大根，爽口令口感更加豐富。

Photo from PressLogic

另外兩款小食就係京燒片皮鴨漢堡同黑椒扒漢堡。小編都試埋一個叫怪獸蛋嘅小食，其實即係炸淮山球（$32）。將淮山同薯仔撈埋一齊炸，食落係似普通炸薯波嘅，不過就帶少少淮山味，炸得啱啱好，外皮唔會太厚太硬，亦都無好油嘅感覺。

小編覺得呢個純素漢堡嘅概念好好，並唔似坊間嘅素漢堡，要特登做到好似普通漢堡咁。我就覺得好在對於素食者黎講，可以食素都食得邪惡啲；對於小編呢啲黎講就有種漢堡新體驗，原來漢堡都可以咁嘅感覺。真心推介，好值得一試！

Veggi Monster
地址：上環永樂街1號世瑛大廈地下B店（永和街內）
電話：28860325
營業時間：11:30-20:30

Text: Holiday Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）
*本文章的圖片均經其本人或其公司授權，其他媒體不得轉載