旅行後遺症 去旅行去得咁開心阿喇 有啲野要還㗎！點解去玩旅行好似仲抑鬱咁嘅...

港人生活壓力大，患有抑鬱指數亦都越黎越高，世衛甚至預測喺2030年，抑鬱症會成為世界頭號殺手添！所以好多人都成日想出走，逃離人類荒謬。去個快閃旅行都好，只係想散散心，搵番初衷、熱情、目標同夢想。只可惜逃離完又點，去完旅行番香港，有旅行後遺症嘅人分分鐘仲多。一齊睇睇自己係咪都患咗旅行後遺症？

Photo from Pinterest

1.個喼長期未清

Photo from Pinterest

小編係懶到出汁嗰啲朋友黎，張床啲衫可以堆到成座山咁，與衫共眠係完全唔覺得有問題thanks。更何況去完旅行，搭完飛機咁攰，開個喼拎手信出黎都懶，其他瑣碎事就唔洗講喇～唔到用嗰日都唔願拎，小編試過耐到唔記得原來仲係喼度未拎出黎，搵黎搵去都搵唔到～

2.養大咗個胃

Photo from Pinterest

以下係一項無明文規定嘅約束，然而每位旅客都會遵守：
「去旅行務必要餐接餐，飽到反胃仍然繼續；無懼會肥幾k，旅行就係放縱。」

無錯！唔知點解大眾市民都會有一個唔知出處嘅觀念，去旅行就係要狂食，一日十餐不是夢，基本上係餐接餐。當習慣咗食完正餐食甜品，食完甜品食零食，食完零食又食正餐，無限loop。番到香港，明明平時食譚仔嗌少米都食唔曬，但係番到黎直情想加底...

3.後悔洗大咗
Photo from PressLogic
有無人同小編一樣，去旅行唔睇價錢？小編有時直情係hyper到腦殘，即係例如喇下，係香港買呢隻戒指係HK$640，去到外地對番匯率就係HK$599，然後就會驚嘆話：「痴線！呢度平勁多囉，唔得我要買啊！」就係咁平就平得少少，但係買就買好多，番到香港會發現原來去個台灣都可以洗成萬蚊。睇番自己買嘅野，就會問自己，我有買過咩？說好的窮遊呢？

4.格格不入
Photo from Pinterest
基本上係旅行最尾嗰日就會開始黎料，諗到返工又要對住啲西人，就反曬白眼。返到公司會感覺自己係個新人，覺得自己係零，你明唔明。即係覺得身邊啲同事好陌生，硬係覺得佢地講嘅話題自己插唔到嘴。覺得自己係世上最慘嗰個，覺得無人明自己，孤軍作戰咁囉~

5.迷失
Photo from Pinterest
有人話當一個人開始迷失時，應該去個旅行，睇清楚啲自己想要乜。但係小編自己去玩旅行反而仲迷失...番到黎會諗究竟自己想要咩，依家又做緊咩？今次唔方唔「閉起雙眼你做想做咩，眼睛張開竟然做緊咩」喇～

6.效率低迷期
Photo from Pinterest
okay！雖然平時返工返學做野效率唔係特別高，但係去完旅行返工效率一定特別低囉～～先不論腦閉塞，諗唔到野。直情係望住部電腦發呆，個腦空白，又或者不停諗緊旅行啲野，又會好傻豬咁諗明明琴日仲喺魚市場食緊刺身...回神已經係一個鐘後嘅事，仲要發現自己咩都未做過，但已經就黎收工，即係意味住又係OT嘅時候喇Yeah！

各位！唔返工又邊得黎咁多錢俾你去旅行呢？人生就係咁先有意思㗎嘛，返工個人繃緊咗，咪去旅行放鬆下，可能會更加識得享受旅行嘅時光呢～也許人生慢慢長路，學識收放自如，放鬆時放鬆，認真時認真，脫離旅行後遺症都係一生入面重要嘅一大課啊～

Text: Holiday Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）
*本文章的圖片均經其本人或其公司授權，其他媒體不得轉載