大台玩家庭溫暖 重溫四葉草經典一刻 80後90後嘅青春 四葉草四部曲回顧

唔知大家有無睇到琴晚嘅《萬千星輝頒獎典禮》呢？咁多個獎項頒發又合唔合你心意呢？不過小編全晚最有feel除咗係得獎者講感言嘅時候，仲有呢一part...

大台今年用家做主題，將每套劇集營造出家嘅感覺，當頒發最佳劇集歌曲嘅時候就請咗當年（2003）唔單至劇紅，連主題曲都hit爆嘅《當四葉草碰上劍尖時》嘅主要演員頒獎喇！包括黎諾懿、唐詩詠、姚子羚、傅嘉莉，仲有好耐無見嘅李逸朗添！小編嘅青春回憶真係返曬黎！

Photo from TVB

最震撼嘅係當年首主題曲《Shining Friends》前奏嗰幾粒音一播，啲主角慢慢行出黎嗰下，不得了！有種莫名嘅感動。

當年四葉草四部曲係唔少80同90後嘅回憶黎㗎！係大台少有嘅青春劇，第一部反應好好，順應推出埋第二、三、四部。當年每一套四葉草都捧咗好多靚仔靚女出黎㗎！有啲真係估唔到原來有份參演啊～

1.首部曲《當四葉草碰上劍尖時》（2003）

第一套四葉草係以劍擊做主題，講述一班新生係崇藝私立高校嘅學生，四位男主角就係學校入面劍擊學會嘅四劍俠，由本身點樣互相爭鬥、互相討厭、互相爭女，到後尾要合理參加比賽，關係又有咩變化呢？而幾位女仔就為學校停辦好耐嘅校刊重新出版，當中當然唔少得男女之間嗰仲曖昧情愫，兩難追一女嗰啲野喇。

當年捧紅嘅女主角就係超有美貌嘅新加坡女團2R嘅Race～

另外仲有唐詩詠、戴夢夢、姚子羚同傅嘉莉。BTW小編想講子羚真係女大十八變，靚女咗好多～～

男仔方面就有李逸朗、黎諾懿，仲有好少見嘅李雨陽同陳宇琛。

當年主題曲係《Shining Friends》，「Sun will shine～～my friend」

2.二部曲《赤沙印記@四葉草.2》（2004）

第二輯就係以沙灘排球為主題，呢套都係四葉草系列入面非常為人熟識嘅一套。卡士有變，女主角換咗楊秀惠、李思欣、陳自瑤。男主角就有司徒瑞祈同蔡淇俊喇！

仲有馬德鐘做教練添～

亦都搵咗好多名人客串㗎！包你估唔到原來徐子淇都有份飾演miss添！

3.三部曲《盛裝舞步愛作戰》（2008）

今輯就係以馬術為主題，開頭以男女主角洪卓立同衛詩雅做引線，兩位青梅竹馬由一齊到分開，後黎又喺大學重遇，仲識咗其他同學，佢地六個就由男女惡鬥變成知心好友喇～

另外仲有龔嘉欣同林威辰、趙碩之同陳家樂、關婉珊同羅仲謙～

仲有Mandy Lieu、許志安同李蘊等等。


主題曲係《一步一傾心》

4.四部曲《南華夢飛翔》（2009）

今次就係以足球為主題。以上三輯系列嘅男女主角都成功彈出，但呢輯就相對黎講比較沉寂喇～有何浩文、李豪、羅鈞滿、盧頌之、李婷、羅天宇、許佩榆等等。

唔知係咪想觀眾有返當年四葉草第一部曲嘅感覺，主題曲亦都《Shining Friends》不過就轉咗馮曦妤主場版本～

只能說回顧完畢，TVB真係好少呢啲咁青春嘅偶像劇，四葉草可能唔係最優秀，但一定係最經典，係大家嘅回憶，小編決定今晚返去要重溫返！

Text: Holiday Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）
*本文章的圖片均經其本人或其公司授權，其他媒體不得轉載