日本「神宮」「神社」「寺廟」傻傻分不清楚？正確參拜應該係點？

去日本，跟團嘅話，十個有十一個都會帶你去神社嗰啲度參拜，因為好多日本人都好信奉神明，所以當係體驗了解下人地嘅文化又得。但係去就去得多喇，自己去嘅究竟係神社？神宮？定係寺廟呢？咁正確嘅參拜又應該係點你又知唔知？

1.神社

Photo from Pinterest

神社其實好易認嘅，就係門口有個好大嘅鳥居⛩️。而供奉嘅對象就非常繁多，無論係動物或者無生命嘅物體，又或者係傳說、歷史人物，都會係佢地供奉嘅對象黎嘅。一般嘅神社唔算好大，如果比較大型嘅神社會有「大社」之稱。

2.神宮

Photo from Pinterest

如果該神社係用黎供奉日本皇室祖先，或者同皇室有相當淵源嘅人，就會稱為「神宮」喇！咁話明係供奉皇室嘅人，咁規模都會比普通神社大好多。

3.寺

Photo from Pinterest

寺廟同以上兩個好唔同就係無鳥居，同埋供奉嘅係「佛教」神祇，信眾可以拈香參拜。寺內有出家嘅和尚，有啲有墓碑。好似東京超出名嘅淺草寺同京都嘅清草寺咁。

參拜方式（神社 神宮）
入神社之前，亦即係當見到鳥居嘅時候，可以輕輕鞠個躬先。

Photo from Pinterest

入到去會有個叫手水社嘅小池，上面放咗勺子，比人清潔用嘅。而清潔嘅步驟都好講究㗎，首先用右手攞勺子裝水，洗左手；再用左手攞勺子，洗右手；然後用右手攞勺子，倒啲水落左手，用左手上嘅水漱口。最後將勺子直立，等勺子內剩餘嘅水從上流到下，清洗杓柄，再將勺子放回原處。

Photo from Pinterest

以上要注意嘅係千祈唔好直接用口就咁掂勺子飲水啊，而且以上嘅步驟係講緊喺同一殼水度進行㗎！

另外，行路原來都有特別㗎，喺參道上，亦即係由鳥居通往拜殿嘅一段路，其實係應該行路嘅兩旁，因為日本傳統係認為參道中間係由神明行走嘅。而且參道地上會有啲石仔，係希望令參拜者鞋嘅污泥去除，乾乾淨淨咁去參拜嘅。

去到參拜喇，首先要清理手上嘅野先，可以放入袋或者放喺腳邊，然後鞠躬敬禮。投放錢入賽錢箱時要盡量輕輕力嘅。通常都會投放日圓嘅五元，原來係因為喺日文五元同緣分嘅發音好似，不過～～～如果無五元其實都無所謂嘅，都係誠心最緊要嘛。如果你投入嘅賽錢箱上面有搖鈴，就可以搖鈴一至三次，呼喚神明。之後就可以敬禮兩次再拍手兩次再雙手合十許願再敬禮一次，口訣就係「2禮2拍1禮」。

Photo from Pinterest

參拜方式（寺）
喺入寺廟前合掌行禮，如果有手水社，就可以用喺神社一樣嘅方法洗手漱口。如果殿旁有鐘樓，千祈唔可以自己任意敲鐘啊！

Photo from Pinterest

開始參拜，入咗去拜殿就可以買香，點燃然後拜祭，呢個時候可以投一啲香油錢，祭拜完就將香插喺香爐度，然後可以將香爐上的香煙用手攬向自己嘅身度，有傳咁樣係有去霉運嘅效用。

Photo from Pinterest

另外有啲寺廟仲有蠟燭賣，有傳點蠟燭可以去厄運，不過只可以點自己嘅蠟燭，如果幫咗人地點就好似接咗人地嘅晦氣喇。

Photo from Pinterest

哇～小編今日真係學咗好多野啊～原來以前啲禮儀係錯曬，點好...無嘢嘅...誠心最重要嘛～（好似係）

Text: Holiday Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）
*本文章的圖片均經其本人或其公司授權，其他媒體不得轉載