蛋糕、薯片、牛奶統統都有，同場加映朱古力蛋糕
冬天係士多啤梨當造嘅季節，大家可以狂食唔同地方又大又甜嘅士多啤梨！其實零食都默默掀起咗新一輪「士多啤梨風」，台灣兩大便利店更加接力式係咁出「士多啤梨系」食品，草莓控各就各位！
1.草莓鮮奶茶
草莓系列嘅飲品唔算多，呢款奶茶近期hit到爆，2個可愛嘅包裝合埋變一個大大嘅士多啤梨，因為用咗50%生乳，所以奶味非常濃郁，不過唔少網民試過覺得士多啤梨味唔算突出。
2.北海道草莓風味汽水
一聽到士多啤梨+汽水，好多人都好擔心會係藥水味，呢款汽水超級士多啤梨，好似新鮮榨取好多士多啤梨咁，加埋氣泡，味道有驚喜，鍾意飲甜嘢可以一試。
3.草莓蜂蜜水
冬天喉嚨比較容易乾，最好就係飲蜂蜜水滋潤一下～～草莓蜂蜜水甜上加甜，好多人都話有D似草莓果醬液體化加蜂蜜，有人會覺得太甜，睇下你平時鍾意飲甜定唔甜喇。
4.草莓味薯片
如果你見到有便利店賣緊，記得掃返幾包啦，因為今次士多啤梨味薯片味道真係唔錯，甜度唔算高，加上係大牌子出品，所以大家都抱住好奇心去買，甜甜酸酸嘅味道，聽講仲有D士多啤梨籽，係咪真，買包試試先。
5.草莓口味雷神巧克力
比起前者，好多網友都覺得呢款「雷神朱古力」比較好食，士多啤梨朱古力外層包住朱古力脆脆，外層微甜內裡好有口感，下午茶口痕必備，不過一條台幣$28好似貴咗少少。
6.草莓天使蛋糕
呢款天使蛋糕唔多講，必搶！必搶！必搶！一開門瞬間清貨嘅士多啤梨蛋糕裡面有爆曬出嚟嘅士多啤梨果醬，外面嘅天使蛋糕都係粉紅色，好有空氣感所以特別軟熟，而且size都幾大，都係台幣$28，其他嘢可以唔試，但呢個見到真係要即刻畀錢。
7.草莓大福
大熱草莓大福再度登場～～煙煙韌韌嘅外層之下有雪糕包住士多啤梨果醬，內層超級飽滿，食一個大福已經大滿足！
8.草莓乾
鍾意健康食物嘅你終於有一款手信可以帶返香港，呢款士多啤梨乾採用新鮮士多啤梨肉，細細包酸酸甜甜，食完都唔怕會變肥仔肥妹～～
9.草莓戀奶酷繽沙
Photo from 全家
呢款沙冰係升級版，用上奧地利草莓製成的草莓原汁再加上牛奶雪糕打勻，牛奶雪糕平衡番士多啤梨嘅酸，裡面仲有白朱古力外層士多啤梨乾，雖然天氣好凍，但值得一試！
其實仲有好多士多啤梨系產品，大家去便利店嘅時候可以細心留意下，因為呢期仲係草莓季，所以各大便利店都會keep住出新嘅相關產品。而同一時間，仲有幾款非士多啤梨類都超級受歡迎，好似係：
伯爵巧克力餅乾泡芙／脆皮香草雙餡泡芙
呢兩款泡芙外層都相當脆，一切開裡面D吉士同朱古力cream流曬出嚟，試過嘅網友話香草味因為出面嗰層係糖霜所以太甜，反而伯爵有黑朱古力嘅苦剛剛好，小編覺得有得食邊款都好食！
巧克力紅茶蛋糕
試過士多啤梨天使蛋糕又鍾意嘅話，新推出嘅朱古力紅茶味你都一定唔可以miss啦～～蛋糕裡面嘅餡料係榛果朱古力！！加埋香濃茶味嘅蛋糕，配咖啡一齊品嚐，真係最佳組合～～
Text: Holiday editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編～謝謝～）
*本文章的圖片均經其本人或其公司授權，其他媒體不得轉載
【想隨時隨地緊貼本地食買玩資訊？】
👉🏻 立即下載 HolidaySmart 假期日常APP
👉🏻 即刻Follow我地Instagram holidaysmart.hk
👉🏻 訂閱我地 Youtube Channel
