what?過年唔拜得年？你所不知的新年避忌 原來往年都唔小心犯咗？不知者不罪 睇完今年唔好再犯喇！

仲有幾日就過年喇！真開心，對小編黎講，過年之意在於逗利是～哈哈，但係原來過年有好多事項要注意㗎，唔好掛住逗利是而忽略咗一啲新年避忌啊！想今年順順利利行好運？就一定要留意以下嘅幾點喇！

年初一
1.沖涼、洗頭
Photo from Pinterest
小編一直都係初一唔洗頭（然後一過凌晨12點就去洗頭～），原來涼都唔沖得㗎！會將財富同財運沖走咁話窩～唔怪得一直都發唔到達喇！

2.打爛嘢
Photo from Shutterstock
即係其實打爛嘢黎講就幾時都唔好㗎喇，不過初一就更加唔吉利喇，破財破運啊女～不過～～～～萬一真係唔小心打爛嘢，可以用紅色紙包住，再念住「歲歲平安」、「歲歲平安」咁，如果有神台，可以放上神台五日。不過小編表示平時會講佢「落地開花！富貴榮華～」就算。

3.洗衫、掃地、倒垃圾
Photo from Shutterstock
呢啲都係會掃走財氣同運氣嘅活動黎㗎！

4.催人起身／被催起身
Photo from Shutterstock
名正言順同阿媽講，大年初一麻煩唔好叫我起身，尤其係唔好叫我全名唔該，因為咁樣會令我成年都被人催催催㗎！

5.訓晏教
Photo from Shutterstock
唔知有無人同小編一樣，初一朝早拜年到夜晚食飯都係對住同一班親戚，仲要都係喺同一個屋企，晏就無嘢做真係好想訓教，但原來大年初一訓晏教會影響事業運㗎！所以點都唔好訓啊知無！

6.食肉、粥、藥
Photo from pinterest
初一食齋應該好多人都知喇，原來係因為初一忌殺生。小編屋企初二早上食粥，但初一就只有齋，原來係因為以前嘅人因為窮所以要食粥，所以如果大年初一食粥，就會有成年貧窮嘅意思。另外健康無病痛嘅人都唔建議喺大年初一食補藥包括維他命丸嗰啲。

7.煮新飯
Photo from Shutterstock
意思係初一應該食年三十食盛嘅飯菜，寓意去年嘅食物食唔完，今年仲有剩。唔洗憂柴憂米喇～

8.女兒返娘家
Photo from Shutterstock
出咗嫁嘅女兒就唔應該喺初一、初四同初五當日回娘家，會令到娘家嘅家宅運唔好咁話窩～

年初二
9.送禮送單數
出咗嫁嘅女兒返娘家，送禮千祈唔好送單數啊，一定要成雙成對，如果唔係就唔吉利喇～

年初三
10.拜年
Photo from Shutterstock
初三係赤口日，亦即係凶日，所以並唔適合拜年。有傳初三拜年，同邊個拜年就會同邊個鬧交的喔～

哇～原來一直以黎都唔小心犯咗呢啲，不知者不罪...無事嘅無事嘅...今年開始大家都記得留意喇！

Text: Holiday Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）
*本文章的圖片均經其本人或其公司授權，其他媒體不得轉載