4月超強新番推介！多款人氣大作 復活節有排煲～

時間踏入3月，好多動畫播埋呢個月就開始完喇，小編率先話你知4月開始有咩新番動畫值得睇，當中仲有唔少人氣大作回歸！！復活節又有排煲動畫了......

《東京喰種:RE》（4月3日放送）

先睇咁多款人氣大作，首推當然係人氣作《東京喰種:RE》，喺香港人氣好高，早排先出完真人版電影，就算冇睇開動畫都識！新一季講CCG搜查官佐佐木琲世的故事，佢仲有可能就係上季主角金木研，想知發生咩事就要自己睇喇。

Photo from 株式會社Marvelous

《我的英雄學院》第三季（4月7日放送）

另一款人氣作仲有《我的英雄學院》第三季，受JUMP熱捧，係一套熱血作，類似《一拳超人》的英雄故事， 不過更多著重講主人公成長，鍾意睇《一拳超人》的朋友唔好錯過。

Photo from 僕のヒーローアカデミア

《食戟之靈 餐之皿 遠月列車篇》

真係好多人氣長篇動畫呀，《食戟之靈》第四季已經決定會喺4月開播，故事以料理對決做題材，又熱血又有得睇美食，追開的朋友又可以睇了。

Photo from shokugekinosoma.com

《刀劍神域外傳 GGO》

同樣確認4月開播的仲有《刀劍神域外傳 GGO》，《刀劍神域》呢個派頭有睇動畫都好熟悉啦，雖然今次係外傳，冇桐人同阿絲娜出場，但係今次講一個身高183的女大學生，以唔夠150身高走入遊戲世界的冒險故事，都幾得意。

Photo from gungale-online.net

《奴隸區 我與23個奴隸》

特別推介多兩套動畫，首先係《奴隸區 我與23個奴隸》，主打暗黑風格，講述世界上有令其他人服從自己的器具「SCM」，24位主角就展開各自決鬥，鍾意暗黑寫實類可以一睇。

《阿宅的戀愛太難》

最後係《阿宅的戀愛太難》，漫畫已經超有人氣，搞笑博虐單身狗，單身又樂意比人取笑的你可以睇下。

Photo from pixiv

Text: Holiday editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編～謝謝～）

*本文章的圖片均經其本人或其公司授權，其他媒體不得轉載