《再見小熊心》影評～就算唔係FANS都會覺得好睇！創作小熊維尼背後犧牲一個小朋友嘅童心

唔少人一聽到《再見小熊心》係一套作者傳記，會即刻覺得「一定好無聊啦！」，但只要入場睇過嘅觀眾都唔會認同呢句說話。當中既有溫馨嘅歡笑、父母忙碌帶畀小朋友嘅寂寞、大賣童話書背後所犧牲嘅嘢等，唔係普通人物傳記咁簡單～如果係Winnie the Pooh Fans嘅話就更加要睇！

Photo from Goodbye Christopher Robin

故事係講第一次世界大戰後，英國一片愁雲慘霧，AA米恩（當勞格利遜）因為上過戰場，戰場嘅經歷令佢戰後都仲有心理影響，而就算佢寫作事業上成功，都無辦法令佢開心，因為佢想寫關於唔再戰爭嘅故事。

Photo from Goodbye Christopher Robin

佢唔理妻子戴芬妮嘅反對，用寫作為理由，成家搬到去遠離城市嘅郊區。唔經唔覺拉近咗平日關係唔太親近嘅阿仔基斯杜化同佢嘅距離～基斯杜化充滿童心嘅幻想，以及當日一句「如果為我寫本書，我會好開心」激起米恩嘅靈感。

不過呢個安慰人心嘅Winnie the Pooh故事，卻令到阿仔帶來另一種面貌同情況……

Photo from Goodbye Christopher Robin

無悶場 歡笑夾雜無奈同怨恨
原本以為會係比較平鋪直敘嘅電影，但睇落就會知道唔係。開始嘅時候會覺得呢家人好溫馨，大家都有自己嘅花名，喺屋企都會叫花名，好似AA米恩叫Blue，阿仔基斯杜化就叫Billy咁～

當中兩父子因為唔同嘅事發生，間屋得返佢地兩個，發生咗唔同嘅趣事，都令觀眾會心微笑～關係好似通過喺郊外生活、唔同嘅共同活動，令彼此之間距離一步步咁拉近～

Photo from Goodbye Christopher Robin

不過當Blue（AA米恩）要創作由Billy幻想出嚟世界，將佢寫落書到嘅時候，就令到Billy嘅世界有極大嘅改變。而呢啲改變令佢逐漸失去快樂同童心。佢掛住同Blue一齊玩、一齊探險、一齊共同做嘢嘅生活，但無論係佢定Blue都變到愈嚟愈忙……一切都唔同晒咁。

Photo from Goodbye Christopher Robin

並非好似童話咁得「美好」

呢套作者傳記唔係一面倒講Winnie the Pooh作者嘅好，當中描繪佢對阿仔嘅不足，同埋當本書大賣嘅時候，因為忙碌又再忽略Billy熱切期待嘅眼神。

見住Billy因為成名愈嚟愈多唔符合佢年紀嘅委託，又隻眼開，隻眼閉咁。到Blue真係意識到係個大問題嘅時候，都已經遲咗。

Photo from Goodbye Christopher Robin

細膩真實父子情
《再見小熊心》用咗唔少細節著墨係Blue同Billy嘅父子關係，由疏離到拉近，再拉遠而令Billy好似覺得好似被利用咁，而且原本佢期盼嘅係爸爸可以為佢寫一本書，而唔係寫佢。

到尾段，Billy再唔係小朋友，成長為少年嘅時候對Blue嘅態度，同埋搭火車前同佢講嘅一番話，都令觀眾印象深刻，甚至忍唔住落淚。

Photo from Goodbye Christopher Robin

Fans嘅話一定會想知創作背後嘅事
如果係Fans，應該要入場睇下《小熊維尼》係點樣構思出嚟，原來係描繪一個小男孩嘅想像世界，同埋Winnie the Pooh點解叫「Winnie the Pooh」。以及了解到為咗呢個可以安慰戰後人民心靈嘅故仔，背後係犧牲一個小朋友嘅快樂同童心。

《再見小熊心》3月15日上映～

Text: Holiday Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）
*本文章的圖片均經其本人或其公司授權，其他媒體不得轉載