觀眾希望配角都係原班人馬，隔咗咁多年，雪兒依然咁靚呀！

喺香港國際影視展度，古天樂嘅公司「天下一電影」 宣布落實開拍經典電視劇《尋秦記》電影版，將會由原班人馬擔任三位主角，包括古天樂、林峯同埋宣萱。呢個消息傳出大家都非常期待，畢竟呢套劇係唔少人嘅童年回憶，亦都係古仔最後一套TVB劇集！

電影版詳情暫時未有公佈，不過故事內容應該都會忠劇集本身。喺電影公司公開嘅電影海報度，畫面加入咗機械元素，估計電影版應該會揉合科幻元素，反正都係要穿越，今次索性帶多D新時代嘅嘢入去啦～～

隔咗近17年，三位主角喺演藝生活都有更輝煌嘅發展，不過外表上大家分別唔係好大，不過呢套劇感受歡迎，唔單止係主角嘅功勞，其他角色都好重要，特別係一班美女，仲有江華呀！！

期待人物1:郭羨妮

Photo from 《尋秦記》

劇集版Sonija一人分飾兩角，古代版嘅佢最後同宣萱一齊伺候古天樂，但現代版嘅佢就無太多交流。

Photo from 《尋秦記》

近年Sonija專心湊女，間中都會出席下活動，檔期啱嘅話，隨時可以請到佢演出，不過戲份可能會少好多～～不過外貌而言，宜家嘅佢比以前更成熟，做番古裝溫文爾雅嘅角色，絕對唔係問題～

A post shared by 郭羡妮 (@sonijakk) on Mar 16, 2018 at 1:42am PDT

期待人物2:雪兒

Photo from 《尋秦記》

雪兒飾演嘅公主天真爛漫，當年見到佢做古裝唔少男士都心心眼，覺得佢真係好可愛，對古天樂痴心一片，可惜最後慘被殺死，如果電影版可以畀多D畫面佢就好啦～

Photo from 《尋秦記》

畢竟咁多位女星入面，雪兒防腐程度最高，之前喺《殺破狼．貪狼》同古仔重聚，小編覺得佢再演機會都幾高，四字頭嘅佢依然同以前一樣咁sweet，如果電影版真係有佢 ，應該有唔少粉絲會去戲院捧場！

A post shared by Michelle Saram 雪兒 (@michelle_saram) on Feb 22, 2018 at 2:31am PST

期待人物3:滕麗名

Photo from 《尋秦記》

電視劇入面佢飾演嘅善柔英氣滿瀉，佢同項少龍似兄弟多過有男女之情。

Photo from 《尋秦記》

其實善柔暗戀咗人地好耐，可惜最後都無法開花結果，佢同項少龍嘅互動，大家都好鍾意睇㗎～不過近年阿滕越黎越有女人味，soft 咗好多，做唔做得番咁強悍嘅角色都係一個未知之數，加上佢日日都拍《愛。回家》，未必有檔期可以去外地拍攝呢。

A post shared by Sheepyjoycetang滕麗名 (@sheepyjoycetang) on Feb 28, 2018 at 2:03am PST

期待人物4:江華

Photo from 《尋秦記》

江華呢個演技派喺劇集入面完美演繹到連晉呢個角色嘅心狠手辣，說話唔多，每一個眼神同笑容都係另一目的，嗰陣睇佢同項少龍之間嘅火花真係睇到入曬戲！

Photo from 《尋秦記》

咁多個角色裡面，網民最想江華可以演番呢個角色，不過宜家佢已經好少參與幕前演出，要佢出山嘅話，古仔嘅電影公司真係要畀多兩錢肉緊，但小編覺得喺呢個合拍片嘅時代，呢個角色好有可能會由內地演員擔任呢～～

Photo from 江華微博

Text: Holiday editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編～謝謝～）

*本文章的圖片均經其本人或其公司授權，其他媒體不得轉載