離地370米懸崖邊睇住靚景玩高空設施！日本繩索迷宮難度高中低逐級挑戰

日本節目《嵐にしやがれ》報導一個超刺激繩索設施，仲要參加者喺懸崖邊玩，真係好考膽量！此新設施建於離地370米懸崖邊，合共92個遊戲，當中並無任何輔助工具，只有安全索帶作保護，膽小者慎入啊！

Photo from さがみ湖リゾート プレジャーフォレスト

位於日本神奈川縣相模湖渡假村主題樂園Sagamiko Resort，於上年3月開設一個極需要膽量嘅繩索迷宮Muscle Monster。

繩索迷宮內遊戲包括喺咁高嘅地方玩凌空踩單車、橫行獨木橋、空中鞦韆等，若大家一下子玩驚嚇度較高遊戲，相信玩到半路中途已經嚇到一身汗。這設施可分成三層，越往上爬越恐佈，以下推薦大家由低級開始玩至高級，慢慢挑戰自己膽量！

驚嚇度：低

自問想挑戰又比較細膽嘅話，可先玩離地只有3米獨木橋試試水溫先，由於高度並不高，即使只有安全索帶都未算太驚嚇嘅，睇下小朋友都玩到啊！

Photo from さがみ湖リゾート プレジャーフォレスト

挑戰完較輕鬆設施作熱身後，可試下呢個「空中撐艇仔」，挑戰者需要先走一段繩索先會到達艇仔，之後再走繩索到達終點。雖然由3米獨木橋一下子到高空繩索，驚嚇度都不少，但起碼可到艇仔稍作休息。

另外，「空中滑翔」離地15米，挑戰者只要捉實大鷹就可以滑行對面。雖然15米高空確實會令人害怕，但事實上只要雙手捉緊，一下子便會到達對面，而且更有飛翔嘅感覺，絕對值得玩！

Photo from さがみ湖リゾート プレジャーフォレスト

驚嚇度：中

如果覺得所有低級驚嚇度遊戲無咩難度，可以試下將驚嚇度升級，挑戰中級設施！長16m、寬只得2.5cm「鬆緊繩」，絕對讓驚嚇度直升，個膽細少少都可能會係空中腳震震啊！

接下來可挑戰「踩單車過獨木橋」，故名思義就係喺獨木橋上踩單車。雖然獨木橋中間有縫隙畀車輪作固定，而且坐喺單車本來都要平衡，踩單車時單車都會左搖右晃，平衡力可能會令單車歪向一邊，而且雙腳會唔踏實，無疑增加喺橋上跌落嚟嘅驚嚇感。

「彈弓樁」就係要喺高空邊彈邊行，眼望彈弓樁時望到自己身處高空，真係少啲勇氣都唔得，記得捉實手環啊。

驚嚇度：高

仲有膽量挑戰高驚嚇度設施嘅勇者，可以試試位於懸崖邊「空中鞦韆」，挑戰者要順着鋼索走到鞦韆位置，然後用力跳上鞦韆上，最恐佈應該是要由鋼索一跳上鞦韆這動作，夠膽一定要試！

其次是「自由攀爬」，挑戰者要在高空攀石牆，一唔覺意失重心隨時跣腳啊！

最最最恐怖設施嚟啦！這個「斷橋敲鐘」喺面對住370米山頂風景，而且鐘與斷橋有一定距離，要成功敲響大鐘就一定要行到斷橋最出位置，但相信敲鐘一刻極具成功感，更加唔好忘記欣賞下相模湖畔嘅風景啊！

Photo from さがみ湖リゾート プレジャーフォレスト

除了上述設施，仲有繩網、吊環、橫行獨木橋等任玩。由於繩索迷宮為一高空遊樂設施，因此未年滿18歲人士須於官方網站下載並簽署同意書妨可參與各類設施，而且身高必須於120cm以上，體重120公斤以下才可參與，一家大細去玩要留意啦！

さがみ湖リゾート プレジャーフォレスト

Photo from さがみ湖リゾート プレジャーフォレスト

全日通行證成人費用為3,900円（約港幣280元），而小童則為3,100円（約港幣222元），大家可於日本7-11、Lawson、Family Mart、Circle K Sunkus購買預售票，屆時便可直接入場，省去排隊買飛時間。

至於交通也尚算方便，從東京市區搭JR到相模湖駅約1小時後，再從相模湖駅轉搭「神奈川中央交通」公車，約8分鐘後便可到達相模湖渡假村，有興趣的朋友記得預好時間。

樂園資料：
さがみ湖リゾートプレジャーフォレスト
地址︰日本神奈川縣相模原市綠區若柳1634
電話：+81-(0)42-685-1111
開放時間︰9:00am - 6:00pm
網址︰www.sagamiko-resort.jp

Photo Credit：FB@さがみ湖リゾート プレジャーフォレスト

Text: Holiday Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）
*本文章的圖片均經其本人或其公司授權，其他媒體不得轉載