大台綠葉王張漢斌為幾秒戲份搏到盡！入行25年，剝光豬、捱臭啃生魚片都照演！

如果用球賽去比喻一部劇集，綠葉演員就如後備球員。上場時間往往短暫，但依然搏到盡做好自己本份。除因為敬業樂業，更期望默默耕耘能得到觀眾青睞。呢份精神用嚟形容已喺大台演出25年嘅張漢斌絕對無誤！

張漢斌近日喺新劇《棟仁的時光》為三秒鏡頭幾乎全裸上陣，網民紛紛大讚專業！呢位資深綠葉王度終於受到觀眾注意！

Photo from 張漢斌vincent@微博

張漢斌早於1993年加入TVB成為藝員，可以話「作品無數」，但一直只擔任閒角。坦白講，要數佢演過嘅角色名真係有難度，不過最近佢喺《棟仁的時光》就大有亮點！

該集講到張漢斌飾演嘅刻薄保安員「發哥」，捉到偷偷執紙皮嘅「光蘇伯伯」鄭敬基，使陰招令對方當眾出醜。「棟仁」袁偉豪便以其人之道治其人之身，整暈「發哥」再將佢剝光豬困喺升降機內。

Photo from TVB

Photo from TVB

Photo from TVB

裸體鏡頭只得短短三秒，但都露出半邊屁股、僅以雙手遮住重要部位，仲有Close-up，認真犧牲色相！網民睇完後大讚演得夠「放」之餘又專業。張漢斌向傳媒透露，演出時係有啲尷尬，但「劇情合理，做落去都舒服」！果然有heart！

除咗《棟仁的時光》，張漢斌早前喺《翻生武林》嘅演出也大受好評。

Photo from TVB

Photo from TVB

劇中張漢斌飾演押往行刑嘅死囚，拍攝時忍受群眾向面上扔豆腐、生雞蛋，最難頂嘅係食物因高溫發出陣陣酸臭味。據講原本劇情需要張漢斌生吞豬肉自殺，但因生豬肉難以入口，最後改為生哽大嚿三文魚片。觀眾喺電視上只睇到呢幕短短幾十秒，但場戲實質拍咗4個鐘！真係辛苦晒張漢斌！

做藝員付出多收穫少，多年來仍未升上一線，張漢斌依然敬業樂業。佢嘅個人微博常見同劇中演員合照，可見佢完全唔介意角色戲份，享受演出，同合作藝員打成一片。

Photo from 張漢斌vincent@微博

Photo from 張漢斌vincent@微博

Photo from 張漢斌vincent@微博

要堅持演藝理想25年談何容易，相信張漢斌最大動力來自佢嘅家人！47歲嘅張漢斌已有一對可愛子女，做佢永遠嘅粉絲呢！

Photo from 張漢斌vincent@微博

Photo from 張漢斌vincent@微博

（小編公告：如果讀者有任何關於美食、旅遊、玩樂、或者任何新奇有趣事物嘅資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）

*本文章的圖片均經其本人或其公司授權，其他媒體不得轉載