《抱抱我的初戀》會落淚的喜劇！為守護所有重要嘅人而掙扎出唔出櫃 爛蕃茄新鮮度92%

唔少人一知道《抱抱我的初戀》（Love, Simon)係一套校園同志電影，就會聯想係咪會畫面好over。恐怕要令你失望，呢套電影係一套好笑得嚟，又幾真實，而且睇完會有溫暖感覺，甚至被感動。

Photo from foxfilmhk

《抱抱我的初戀》喺外國影評網IMDb得到8.1/10、爛蕃茄給予92％新鮮度嘅高分，而入場睇都會發現唔會失望。

唔係剩係得啖笑，而係會令人深思，會令人想同佢喊埋一份、會因為套戲而覺得好溫暖，亦會感受到主角Simon當中嘅掙扎。怕自己同大部分人嘅唔同，會引嚟偏見、引嚟排擠，得返佢自己一個。

Photo from foxfilmhk

17歲Simon有關係好好嘅父母同妹妹，有一班好老友嘅死黨，但佢從來無同人透露過一個秘密，就係佢嘅性取向，佢鍾意男性。

Photo from foxfilmhk

因為佢一直好珍惜自己所擁有嘅人同事物，怕一旦身邊重視嘅人知道真相，就會離佢而去，會用另一種目光去睇佢、疏遠佢，令佢一直珍惜嘅世界崩潰。

Photo from foxfilmhk

為咗守住呢個秘密，有時身邊嘅人唔覺意講啲傷害到佢嘅說話，佢都可以忍到。不過無辦法同任何人講出呢個秘密令佢有種窒息感覺。

Photo from foxfilmhk

呢個時候有個化名叫Blue嘅男高中生係學校網站公開講自己係Gay（男同志），令Simon忍唔住開個新email去接觸佢，開始同佢傾計，慢慢仲鍾意咗Blue。Simon就不斷諗到底Blue係邊個？

一開頭睇會覺得Simon真係好幸福，佢幾乎有晒大家想要嘅嘢，對佢好好又體諒佢嘅屋企人，有班玩得癲又重視佢嘅死黨。

睇落去會知道，Simon一直好努力去守護佢擁有嘅嘢，用盡佢一切方法去扮自己係鍾意女仔，同大家繼續開開心心咁相處。只係佢收埋咗「鍾意男性」呢個秘密太耐，無辦法同任何人講，明明知道鍾意邊個都唔係錯，但佢就係同身邊任何人都講唔出口。

Photo from foxfilmhk

同Blue傾計令佢可以完完全全做返自己，睇到Simon同Blue講點發現自己係Gay、發生嘅一啲尷尬事，再見到Simon估邊個係Blue，都會令人會心微笑。

Photo from foxfilmhk

同埋好似同佢一齊開心遇到個可以坦白講出自己係同性戀嘅知己，好忐忑咁將佢身邊同學一個個估邊個係Blue，當發生好多蝦碌事，唔少同場觀眾都一齊笑起嚟，但睇到Simon好失望嘅神情，都會有少少令佢覺得可惜。

Photo from foxfilmhk

到後來「被迫出櫃」睇到，大家真係會疏遠佢，同埋佢為咗唔畀人知佢係同性戀做嘅事，間接為身邊嘅人帶來傷害，一下子所有嘢都瓦解。

Photo from foxfilmhk

當佢好嬲咁講應該係由佢決定幾時出櫃，而唔係被決定出櫃，呢個同身邊人講出重要心聲嘅權利，都要被剝奪，都睇到演Simon嘅Nick Robinson演技自然而不造作，會牽動到觀眾情緒，會有種眼濕濕嘅感覺。

Photo from foxfilmhk

一下子失去友情、愛情、親情，返到學校大家歧視咁嘅目光，一大班好朋友唔再理自己。點解同性戀就要同身邊嘅人解釋一大輪，要諗佢地會有咩負面反應，而相比之下異性戀就唔需要解釋？

《抱抱我的初戀》會令你唔覺自己睇緊BL電影，反而係一套會大笑、又會令你喊嘅校園初戀電影，但當中帶出Simon嘅掙扎同矛盾，佢只係鍾意男性，點解要因為咁而承受呢啲嘢？

Photo from foxfilmhk

睇呢套戲會同佢一齊笑，一齊估到底邊個係Blue，一齊因為「被迫出櫃」而感受成個世界唔同晒嘅感覺，甚至同佢一齊成長。

Photo from foxfilmhk

Text: Holiday Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）
*本文章的圖片均經其本人或其公司授權，其他媒體不得轉載