大阪周遊卡無限任搭巴士/地鐵！35個景點免費參觀 連溫泉都有～介紹埋3款周遊卡睇下點用

準備遊日嘅旅客注意啦！除咗一般機票、住宿外，平時遊日嘅交通、門票等花費亦不少，如果喜歡一日內周圍走嘅朋友，淨係計交通費相信都已經牙痛咁聲！大家不妨到達日本後，買一張「大阪周遊卡」，除咗可於期間無限次免費任搭地鐵及巴士外，當中仲有35個熱門景點免費入場、多間店舖及設施優惠，超抵買！

Photo from Photo Credit from https://www.osp.osaka-info.jp/cht/

35個熱門景點免費入場 睇展館浸溫泉費用全免！
「大阪周遊卡」最吸引嘅一定係35個免費入場嘅景點！當中包括多個觀光船熱點、博物館及美術館、動物園、寺廟及溫泉勝地，全部都免費入場㗎！以下精選4種可以免費入場嘅景點～

Photo from Photo Credit from https://www.osp.osaka-info.jp/cht/

1. 大阪生活今昔館 (大阪市立人居博物館)
日本首間以大阪「住宅和生活」為主題嘅博物館。館內以實物大小重現江戶時代後期嘅大阪街市風光，入面仲設有和服體驗，着埋和服遊走江戶時代，絕對係影相打卡嘅好時機！

Photo from Photo from FB@大阪くらしの今昔館

但要留意免費入場僅限於常設展及企劃展，如果大家有興趣參與和服體驗，都需要另行收費㗎！

Photo from Photo from FB@大阪くらしの今昔館

2. 天然溫泉
「大阪周遊卡」可用於兩間天然溫泉店，包括天然溫泉浪速之湯及天然露天溫泉SPA住之江。浪速之湯嘅天然溫泉有「美人湯」嘅美譽，大廈頂樓設有露天浴場同岩盤浴等，但要注意想浸岩盤浴的朋友都需要另外收費㗎！

Photo from Photo from https://www.osp.osaka-info.jp/cht/

而SPA住之江就好似置身於竹林內浸溫泉咁，相當寫意。除咗擁有室內的多彩浴室外，仲提供各種有助放鬆身心嘅設施。

Photo from Photo from FB@Spasuminoe

3. 美術館/博物館
「大阪周遊卡」所適用免費入場嘅美術館及博物館多達10多間，相信中意閒逛展館嘅朋友，總有一兩間啱心水又順路！當中包括大阪市立東洋陶瓷美術館、國立國際美術館、大阪歷史博物館、大阪市立科學館及上方浮世繪館等。

Photo from 國立國際美術館（Photo from FB@nmaoJP）

Photo from 大阪市立美術館 （Photo from https://www.osp.osaka-info.jp/cht/）

Photo from 大阪歷史博物館（Photo from https://www.osp.osaka-info.jp/cht/）

但也要注意部分展館免費入場僅限於展廳，大家記得睇清楚免費入場嘅展廳範圍外，亦要留意展館開放時間，以免去到摸門釘！

4. 大阪天王寺動物園/四天王寺
中意動物嘅話可以用「大阪周遊卡」去大阪天王寺動物園，同樣免費入場！

Photo from Photo from FB@Tennojizoo

若到天王寺附近參觀，不妨去埋四天王寺，同樣可使用「大阪周遊卡」免費入場！四天王寺喺每月21號同22號係廟會日，會擺多個露天攤位，大家可Mark實行程參觀！

Photo from Photo from https://www.osp.osaka-info.jp/cht/

除咗上述嘅熱門景點外，有興趣嘅朋友都可於以下官網網址瀏覽所有免費入場的設施及詳情！
免費入場設施詳情：https://www.osp.osaka-info.jp/cht/about/about_train.html

3種周遊卡類型 免費交通範圍各有不同！
周遊卡類型分為一日券、兩日券及萬博紀念公園版一日券3種，3種類型門券於景點及商店優惠上大致相同，但喺免費乘搭交通工具嘅路線上就唔一樣啦！所以大家喺購買周遊卡時，除咗考慮想用一日定兩日，仲要睇清楚自己預先訂好嘅行程範圍適用於邊款周遊卡上，如果唔係就本末倒置，分分鐘比多咗錢買周遊卡又用唔着！

一日券可免費使用交通範圍：

Photo from Photo Credit from https://www.osp.osaka-info.jp/cht/

一日券比兩日券的可使用範圍大，一日券優勝之處是可用於私鐵上，而兩日券則不可。

兩日券可免費使用交通範圍：

Photo from Photo Credit from https://www.osp.osaka-info.jp/cht/

(一日券)萬博紀念公園版可免費使用交通範圍：

Photo from Photo Credit from https://www.osp.osaka-info.jp/cht/

萬博紀念公園版一日券比普通一日券多1條私鐵(大阪單軌電車)可免費無限次乘搭，此條私鐵只適用於到萬博紀念公園，如果要去參觀，就可考慮買萬博紀念公園版啦！

TOKUx2優惠券 連食嘢都有折扣優惠！
購買「大阪周遊卡」會附上一張「TOKUx2優惠券」，優惠券毋須於周遊卡生效當日使用，只要在到期時出示周遊卡及已剪下嘅「TOKUx2優惠券」即可。當中包括迴轉壽司、和牛烤肉、炸豬排、料理餐廳等，話唔定真係一張周遊卡，可以唔洗太多錢就可玩盡全日！

Photo from Photo Credit from https://www.osp.osaka-info.jp/cht/

優惠券嘅超值店舖及設施遍佈多個地方，大家亦可於以下官網網址瀏覽所有超值店舖及設施嘅優惠詳情！
（優惠設施詳情：https://www.osp.osaka-info.jp/cht/facility/privilege）
（超值店舖詳情：https://www.osp.osaka-info.jp/cht/facility/shop）

周遊卡攻略 最平價錢玩盡日本！
其實最好的方法是先看周遊卡所覆蓋的優惠範圍，再於行程上作出調整。如果未Plan定行程嘅朋友，可按照周遊卡覆蓋範圍，揀選一日到2-3個免費交通嘅地方，參觀數個鄰近免費入場嘅景點，咁應該係最抵方法啦！因為周遊卡只用於一兩天，即使多條交通路線任搭其實也用不着太多！

Photo from Photo from FB@osaka.amazing.pass.cht

如果已大致計畫好行程的朋友，可先留意自己的行程有否涉及私鐵，如連續2天不必用上私鐵，可以考慮購買兩日券，在已訂好的行程上作修改，多加幾個免費入場或優惠設施的景點，最好所揀的日子係要去離住宿較遠嘅地方，咁又再抵D啦！

Photo from Photo from https://www.osp.osaka-info.jp/cht/

若已把行程擠得滿滿，唔想改行程之餘又無太多景點涉及周悠卡優惠之內，咁要先衡量所需交通費或飲食是否比購買一張周悠卡更為花算，因為單計交通費的話，若一天所去地方不多，其實也用不上一張周悠卡嘅售價，因此周悠卡其實需要交通費連免費入場景點及其他飲食優惠去計算先最抵！如果發現所需車費總額比周悠卡售價少，咁唔買周悠卡亦無損失～

周遊卡的官網亦有提供行程範例供大家參考，仲係十五十六嘅朋友不妨去參考下！

「大阪周遊卡」資料：
售價：一日券2,500円(約港幣177元)／兩日券3,300円(約港幣233元)／(一日券)萬博紀念公園版2,950円(約港幣209元)
銷售點：https://www.osp.osaka-info.jp/cht/about/buy.html
官網：https://www.osp.osaka-info.jp/cht/

Text: Holiday Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）
*本文章的圖片均經其本人或其公司授權，其他媒體不得轉載

Holiday長期歡迎大家投稿～我哋會為你開一個個人帳戶作發表文章之用。文章類型包括美食、旅遊、玩樂等同Holiday相關既事物～投稿可以傳送到 holiday@presslogic.com比小編檢查一下先，記住要附上100字內自我簡介。 另外文章一經採用，編輯將會進行潤飾。期待你哋既大作啊！
Follow Instagram: holiday.presslogic