「搵食啫！犯法呀？我想㗎？」⋯⋯黃子華歷年經典金句大集合！

男神黃子華搞笑又貼地嘅棟篤笑，為香港人帶來無盡歡笑同共鳴！

今晚子華神最後一次棟篤笑開鑼，無論大家買唔買到飛、有無時間入場睇，不如都回味吓子華歷年來嘅金句，欣賞呢位棟篤笑始祖嘅幽默哲理。

Photo from 黃子華 - 子華本部@FB

職場篇：

1. 講得出「我好鍾意返工」呢句說話嘅人，一定係鬼上身。
2. 我有一份工⋯⋯叫做陰功！
3. 大自然所有嘅動物都喺食物鏈上面。鏈嘅下層俾鏈嘅上層吃，一層一層咁鏈上去。
4. 啲老板成日話啲員工做野唔攞個心出嚟，激死人；啲員工就成日話老板都唔攞嚿金出嚟，「駛」死人⋯⋯佢俾份人工你，一半係俾你做嘢嘅，一半係俾你受氣嘅。
5. 嚴格嚟講，你每個月俾我嗰份唔係糧，係賠償。
6. 搵食啫！犯法呀？我想㗎？

Photo from 黃子華 - 子華本部@FB

女人篇：

1. 你落左妝我都認得你就叫化妝，你落左我唔認得你就叫喬裝 。
2. 靚就唔洗扮，扮就唔慌靚。
3. 化妝叫make up，女人唔單止俾個make up你睇，仲要俾埋個making of你睇。
4. 女人撞衫，仲大件事過撞車。

Photo from 黃子華 - 子華本部@FB

男人篇：

1. 基本上男人係做到三個不，不主動，不抗拒，最重要我地係不負責嘅。
2. 男人會問：「你愛兄弟定愛老婆？」我會答：「兄弟嘅老婆 。」
3. 豬扒令到我哋啲男人好唔安樂，但卻令到你哋啲女人好快樂。

愛情篇：

1. 愛唔係Part-time，你唔可以話：「愛！做完咪走囉！」
2. 戀愛係一盤生意，你要24小時諗住佢。
3. 如果你沒有時間談情，請你跟我露營。
4. 喺愛情之中，女人最偉大！男人嘅犧牲，就為咗追求美麗；而女人嘅犧牲，就只係得到一個麻甩佬！而最偉大嘅係佢哋根本唔覺得係犧牲。
5. 男人係愛情上係要求新鮮，而女人對愛情最大嘅要求就係保鮮。
6. 你愛嘅，你得唔到；你唔愛嘅，你甩唔到。
7. 呢個世界上有100分嘅男仔，仲有100分嘅女仔，但係就冇100分嘅伴侶。

Photo from 黄子华吧@微博

家庭篇：

1. 我細個讀書唔好，或者唔合格，我冇要父母負責。我自己簽曬啲成績表嘅。
2. 人哋細個成班細路群埋，鐘意玩扮結婚，扮爸爸媽媽。我細個就鐘意扮姦夫淫婦。
3. BB係有一個正式嘅生理學名，佢嘅學名就係「大肚劇痛家吵屋閉賴屎賴尿供書教學無風無浪都起碼都洗你四百萬仲係一定唔還錢」。

Photo from 黄子华吧@微博

政治篇：

1. 共產主義唔係話唔好，你成個國家都係得４個人咪幾好囉！仲要係最好其它嗰三個人都有錢過你！
2. 大家只要有飯吃，生活穩定，就咩都可以唔理！安定生活，先是人民嘅真正鴉片。

3. 點解呢個世界有戰爭？因為我哋有武器囉。咁點解我哋要有武器呀？因為佢哋有武器囉。

   Photo from 黄子华吧@微博

   相信子華神最後一騷將會誕生更多精警金句！

Text: Holiday Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）
*本文章的圖片均經其本人或其公司授權，其他媒體不得轉載