連插隊都屬違法？！遊日必睇十大注意事項 日常小習慣隨時等同無禮貌！

大家知唔知日本有咩禁忌同注意事項呢？有啲甚至連成日去日本嘅人都未必知道㗎！大家記得好好注意以下10點，以免自己連觸犯法例都懵然不知！

Photo from Photo from Shutterstock.com

1. 喺公眾場所插隊即屬違法！
根據「中國駐大阪總領事館教育組」嘅特別提醒，日本早在1958年實施一種叫作《輕犯罪法》嘅法例，意將危害社會或影響公共秩序嘅事項都定性為「輕犯罪」，主要用嚟維持社會日常穩定。

Photo from Photo from Shutterstock.com

其中一項遊日旅客最易中招、又最估唔到嘅，一定係《輕犯罪法第1條13號》嘅「在公眾場所插隊」喱項啦！相信甚至連遊日達人都未必唔知道，如果真係咁唔好彩被警察發現，或有可能會被監禁1-29日，或被罰款1,000-9,999日元，嚴重者仲有可能會拘留同罰錢並行！所以排隊時真係要比啲耐性啊。

2. 使用公共交通工具時電話需較靜音/不可講電話
相信多去日本嘅朋友都會留意到，日本公共交通工具上都貼有禁止使用電話嘅海報。其實喺搭車時，大家都必需將電話較至靜音，同朋友談話時都要將聲量收細㗎，而且最好唔好喺搭車時傾電話，係喺日本表示為對其他乘客嘅基本尊重，以免騷擾在場乘客，亦都可避免打擾到要依賴電子裝置維生嘅老人家或病人。

Photo from Photo from Shutterstock.com

雖然唔犯法，但都唔好做一個無禮貌又影響形象嘅遊客嘛！

Photo from Photo from Shutterstock.com

3. 浸溫泉注意事項
去日本當然唔少得要浸溫泉啦！但大家記得喺浸溫泉前先洗頭沖涼，而且沖涼時要坐喺木凳上面，唔好好似平時咁企喺度沖涼，否則啲水彈到人就唔好啦！

Photo from Photo from Shutterstock.com

另外有好多浴場都會提供一大一小嘅毛巾，小毛巾多數都係用嚟遮住重要部位，落到溫泉池就可以用嚟包頭或者摺好放喺頭上，記得千祈唔好攞嚟擦背或者放入水中啊！如果毛巾整濕咗，亦唔好喺溫泉池擰乾，日本人會覺得你好粗魯㗎！而大毛巾就可以喺浸完溫泉後抹身用～

Photo from Photo from Shutterstock.com

4. 使用筷子用餐要小心擺法
唔好再筷子插入碗飯入面喱啲當然係基本禁忌，但大家可能未必會注意到，其實喺日本用餐後，將筷子直接放喺碗上面都係一個無禮貌嘅表現，大家記得食完飯後要將筷子放返上筷子架。

Photo from Photo from Shutterstock.com

另外，用餐時唔好用舌頭或用口含筷子，亦唔好含住食物講話，以上喺日本人眼中都屬於無教養嘅行為，記得喺日本要將呢啲壞習慣戒掉！

Photo from Photo from Shutterstock.com

5. Wasabi正確食法
好多香港人通常都習慣將Wasabi放入醬油碟內同豉油混埋一齊，但其實喺日本咁做都等同無禮貌！由於Wasabi有抑制微生物生長嘅作用，所以應該將Wasabi放喺容易滋生細菌嘅魚生片上面，之後先再蘸醬油。

Photo from Photo from Shutterstock.com

而且Wasabi並唔可以蘸喺醋飯一邊，因為飯本身多係用調好味嘅醋飯，用飯一邊嚟蘸醬油有大大減退壽司風味之舉，浪費師傅一番心血。

部分高級壽司店師傅會預先將Wasabi塗喺壽司內，所以大家都可以先留意下壽司師傅嘅做法，有需要先再將Wasabi塗喺食物上面。記得唔好再將Wasabi連醬油撈埋一齊啦！

Photo from Photo from Shutterstock.com

6. 影相時唔好偷影路人嘅臉
去日本中意瘋狂打卡影相絕對係一件正常事，但記得盡量避免影到路人嘅臉啊！喺日本，人民擁有拒絕被拍攝或拒絕被拍攝嘅照片被公開於眾嘅權利。

Photo from Photo from Shutterstock.com

如果大家有留意日本綜藝節目，不難發現被拍到嘅路人都會打上格仔以示尊重，所以見到一啲日本人打扮得好靚或者想影得一啲店舖職員時，就盡量唔好偷影人哋啦，可以先徵詢他人同意，再一齊合照就更開心啦！

7. 唔好邊行邊食嘢
邊行邊食嘢喺忙碌嘅香港人心目中相信已經習已為常，但去到日本記得要放慢生活，唔好再邊食嘢邊行路，因為喺日本人眼中非常無禮貌，日本人多都係習慣停低食完嘢先再出發㗎！

Photo from Photo from Shutterstock.com

8. 日本並無比tips嘅習慣
喺香港好多人都會食完飯後比tips，但喺日本並無喱個習慣，因為好多酒店、餐廳都已經喺帳單上收取10-15%服務費，所以畀小費係不必要而且唔係有禮貌嘅行為，所以記得喺日本唔好亂畀小費啦！

Photo from Photo from Shutterstock.com

9. 販賣機旁嘅垃圾桶只可掉飲品罐
香港垃圾桶通常只分為一般垃圾及可回收垃圾兩種，但喺日本唔好見到垃圾桶就「亂拋垃圾」啊！例如喺販賣機旁嘅垃圾桶只可掉飲品罐，即使有小食包裝想掉，都絕對唔可以放入販賣機旁嘅垃圾桶內。

Photo from Photo from Shutterstock.com

另外喺日本丟垃圾可謂非常嚴格，唔同日子都有分咩垃圾類型可丟咩類型不可拋，例如可燃垃圾只可一星期丟2次等，所以大家丟垃圾時要睇清楚啦！

Photo from Photo from Shutterstock.com

10. 叫服務員無需大嗌，以手勢表示
香港人喺餐廳叫服務員時都會有禮貌地大叫「唔該」，而喺日本叫服務員就唔好大嗌啦，做手勢就足夠。只要將手臂向上伸，手掌向下，要郁一郁手指，服務員都已經知道！所以記得唔好大叫，以免騷擾到其他客人。

Photo from Photo from Shutterstock.com

雖然以上好多注意事項都係一種習慣或日常生活嘅小事，但始終入鄉隨俗，而且日本身為禮儀之邦，事事有禮貌為上，以免有當地人介意，成為一個令人討厭嘅遊客啦！

Text: Holiday Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）