當造白桃當道！日本和歌山白桃下午茶tea set！粉嫩多汁～食完有日本白桃拎番屋企！日本水果入饌，附近仲有哈蜜瓜雪糕！

呢間日本餐廳一直以佢地日式下午茶吸引唔少人黎食！最近仲推出左呢個白桃主題下午茶！粉粉嘅外表真係見到都已經覺得好吸引喇！！！！！

係呢個屬於白桃嘅季節，一定要試下最新推出以白桃入饌嘅呢個日式下午茶！
Photo from Presslogic

粉粉嘅下午茶一望就覺得好吸引了！呢個下午茶嘅鹹點出色而且比平時嘅多，又可以食到唔會過份甜膩用天然白桃整成嘅甜品！相信女士們都可以拉埋男朋友一齊黎食！

甜點一共有5款、鹹點5款、再加上英式鬆餅！
Photo from Presslogic

甜點分別有：新鮮白桃葛粉絲、新鮮白桃撻、新鮮白桃忌廉蛋糕、白桃珍珠、蘋果肉雪米糍
Photo from Presslogic

白桃珍珠用左分子料理嘅概念而整成，一粒細細粒嘅「珍珠」！一咬開就爆出鮮甜嘅白桃果汁～真係超級香甜啊！
Photo from Presslogic

新鮮白桃葛粉絲，粉絲好滑溜帶QQ口感，再配埋帶淡淡桃香嘅汁真係好清新啊！
Photo from Presslogic

而用新鮮白桃整嘅幾款甜品都係用和歌山白桃嫁！包你可以食到日本白桃嘅原粒原味～
Photo from Presslogic

Photo from Presslogic

Photo from Presslogic

鹹點用上靚靚嘅草地擺設，每份都精緻咁放係透明玻璃上面，十分吸引！
Photo from Presslogic

鹹點分別有：迷你海膽雜錦刺身飯、迷你手撕豬肉漢堡、芥末蟹肉沙律脆片、蛋沙律法式麵包、法式鵝肝慕絲酥皮卷

值回票價一定係呢款迷你海膽雜錦刺身飯，雖然外型好的骰，但上面舖上新鮮魚生粒粒！仲有海膽啊！係下午茶食海膽啊～會唔會太開心！
Photo from Presslogic

而鹹點真係小編最近食過下午茶入面最高質嘅一間！迷你手撕豬肉非常惹味，上面再舖上一塊炙燒芝士真係超邪惡啊！
Photo from Presslogic

芥末蟹肉沙律脆片食落好脆口，加埋帶微微刺激嘅芥末蟹肉沙律，忍唔住想食多一個！

法式鵝肝慕絲酥皮卷無坊間嘅鵝肝多士咁濃膩，相反配埋香脆酥皮卷好香口啊～

英式鬆餅配上自家製覆盆子果醬同超成本Rodda's忌廉！

又食仲有得拎，下午茶crossover左本地水果供應商FruitMaster！每一位afternoon tea都會送出一整個日本和歌山白桃嫁！
超大一個，而且食落好juicy好好味嫁～所以如果想食到呢個tea set就記得一定要預早打去book位喇！
Photo from Presslogic

日本白桃下午茶
供應時期：白桃當造季節 預計到八月尾
供應時間：星期六、日 15：00～17：30
價錢：每位 $238 (*另收加一服務費)

如果食唔到呢個tea set嘅朋友，如果黎呢度食lunch/dinner都可以用每位$88超抵價，食到呢個和歌山白桃甜品拼盤
同tea set嘅甜品一樣，不過蘋果肉雪米糍就以新鮮白桃肉代替左！記得訂座之前要留定啊！
Photo from Presslogic

Dining at Murasaki
地址：香港銅鑼灣告士打道255號信和廣場UG層8號舖
電話：2817 8383
營業時間：星期一至日 12：00～14：30／18：30～22：30

講到好甜好多汁，記得去試埋iCremeria最新出嘅哈蜜瓜雪糕！佢地嘅哈蜜瓜係用到來自日本北海道嘅赤肉哈蜜瓜！除左有一整塊哈蜜瓜肉之外，個雪糕係以蜜瓜果蓉整成嫁！鍾意哈蜜瓜嘅朋友一定要試啊～
Photo from i Cremeria

Text: Holiday Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）